Anda di sini

PDP patut berunding dulu enti deka bediri ba DUN Dudong

MALCOM
MALCOM

SIBU: Parti Progresif Demokratik (PDP) dipinta tau berunding ari pengingin ati ti deka nganjung chalun bediri ba Kunsil Nengeri (DUN) Dudong maya Pengawa Bepilih Nengeri (PRN) ti deka datai.

Ex-kunsilor Opis Kaunsil Menua Pesisir Sibu (SRDC) Malcom Maing madah, penuduk nya endang enggi Parti Sa’Ati Rayat Sarawak (SUPP) kenyau ari suba.

Ku iya, SUPP agi mayuh kaban parti ti bepenau ke ulih nyadi chalun bediri ba penuduk nya maya PRN tu lalu nadai kebuah PDP ngerampas penuduk nya.

“Nya alai, ba penemu aku PDP tau berunding dulu enti deka bediri ba DUN Duong.

“Enti sida deka bediri ba penuduk bukai nya enda ngawa tang enti DUN Dudong lakka SUPP nentuka nya,” pia ku iya madah ngagai pengarang berita, kemari.

Malcom madah, tebal agi perengkaguna ke digaga di Dudong endang datai ari pengeransing pengari rayat SUPP suba.

Nya nyengkaum pengeransing ari Kaban Kunsil Nengeri (ADUN) Dudong ke diatu, Datuk Tiong Thai King maya ke agi nyadi kaban SUPP sebedau ngalih ngagai Parti Sarawak Bersatu (PBS).

Ba sebengkah pengerami ke diatur di Rumah Gelima, Sungai Durin, bulan Jun suba, Presiden PDP Datuk Seri Tiong King Sing ba jaku iya baka ke madah bisi ati deka nyabung chalun sida ba penuduk DUN Dudong.

Tiong maya nya bisi nyebut nama kunsilor SRDC, Teo Boon Siew nyadi chalun sida maya PRN serak tu.

Nerang enggau nyemetak agi Malcom madah, PDP siti ari komponen dalam Gabungan Parti Sarawak (GPS) lalu sida enti nunda ransing agi begulai enggau rayat dikena nentuka kuing ke baru sepengudah mansutka diri ari Barisan Nasional (BN) suba.

Ku iya, batang tuju GPS iya nya menang ba PRN-12 ti meseti diatur ba taun 2021.

Parti tu ku iya, meseti mandangka diri nyadi parti menua tu empu ti ke lebih agi nemu nama isu ke nyadi di Sarawak enggau penanggul ke ditapi rayat.

“Pia mega, GPS meseti chakah agi mutarka isu menua tu baka Sempekat Malaysia 1963, royalti minyak enggau autonomi Sarawak ngambika rayat nyukung sida ba PRN ti deka datai,” pia ku iya.