Anda di sini

KPLB deka matau tetiap iku penerima program bantu perengka dagang

KUCHING: Opis Menteri Pemansang Menua Pesisir (KPLB) deka matau tetiap penerima program bantu perengka dagang dikena nentuka nya dikena enggau manah kena ngangkatka ekonomi rayat.

Menteri Pemansang Menua Pesisir Datuk Seri Rina Mohd Harun madah, pesereta diberi perengka dagang ti nyadi pelasar orang dagang ngerempaika agi asil produk.

Iya madah, bantu ngagai pesereta kus ‘Quick Win’ ke diberi perintah nya dikena nyukung pengawa bala orang dagang ari kandang menua pesisir ngambika produk sida ulih mansang jauh agi.

“KPLB nengah Opis Pemansang Raban Bansa (KEMAS) deka matau udah ke nyua perengka dagang ngagai penerima dikena nentuka bantu nya diguna enggau chara optimum ukai semina nyadi ‘pemandang’ tauka dijual.

“Penerima ke enda ngena perengka dagang tu ukai semina ngerugika pesereta nya empu tang mega ngeruaka belanja perintah,” ku iya maya sidang media sepengudah nemuai ngagai Palan Sumai KEMAS Kampung Samariang Batu ditu, kemari.

Sekumbang udah megai Opis Menteri, iya deka program nya diangkatmanah laban sebedau tu nadai kala dipantau.

“Kebuah tu, laban kitai deka bisi pemansang ke manah dikena nyapai KPI (Petunjuk Prestasi Utama) ke alai kitai ka pesereta nya mujur nyadi orang dagang ukai semina nyadi penerima aja,” ku iya.

Rina nambah, KPLB melanja nengah agih bantu sepenyampau RM1.8 juta dikena bejalaika kus pengelandik Quick Win ke diatur KEMAS semanjai taun 2017 ngagai 2019.

“Pia mega naka bulan Ogos taun tu, bisi 233 iku pesereta ari Sarawak ngambi bagi ba kus pengelandik ‘Quick Win’ ke diatur KEMAS ngambika ulih ngangkatka penatai pemisi sida.

“Entara kus ke diberi ngagai bala pesereta iya nya bekaul bidang bejait, seni jari enggau nganta,” ku iya.

Ba pengerami nya mega, Rina nyuaka kit perengka set indai beranak enggau mesin jait ngagai pesereta ke bisi ngambi bagi ba kus ‘Quick Win’.

Kus ‘Quick Win’ nya kus pengelandik jangka pandak ke nagit komuniti ke penatai pemisi baruh (B40) ke mungkur ari nembiak, balu enggau Orang Timpang Pendiau (OKU).