Anda di sini

Dr Mahathir: Fokus ngagai pemansang di Sarawak, Sabah

 Kaban BESATU Sarawak enda muai peluang betabi enggau Dr Mahathir slebuh iya ke datai bejadi Pengerami ‘Berambeh BERSATU Sarawak 2019’. — Gambar Muhammad Rais Sanusi
GAGIT: Kaban BESATU Sarawak enda muai peluang betabi enggau Dr Mahathir slebuh iya ke datai bejadi Pengerami ‘Berambeh BERSATU Sarawak 2019’. — Gambar Muhammad Rais Sanusi

KUCHING: Menteri Besai Tun Dr Mahathir Mohamad madahka perintah besai deka fokus agi ngagai pemansang di Sarawak enggau Sabah setipak enggau Juluk Pengelantang Begulai ti dibantaika perintah baru ari baruh pegai Pakatan Harapan (PH).

Ku iya, gaya ba kededua nengeri nya agi kurang diberi fokus kelebih agi ari sukut pemansang enti dibandingka enggau negeri bukai di Semenanjung.

“Kita nemu perintah ke sebedau tu enda fokus ngagai nengeri Sarawak. Enti kitai mandingka kitai meda gaya di Sarawak tu ke kaya enggau minyak tang pemansang enda diagih sama rata entara rayat di nengeri Sarawak empu sereta entara Sarawak enggau Semenanjung.

“Tu kami ulih nentuka nya ari pansik ti udah dipejalaika kami ke alai kami deka berat agi ke Sarawak enggau Sabah ngambika rayat di kededua nengeri tu enda diching enggau ke di Semenanjung,” ku iya lebuh ke bejaku ba program ‘Berambeh Parti Pribumi Bersatu Malaysia (BERSATU) Sarawak 2019’ di sebuah hotel ditu,kemari.  

Dr Mahathir ke mega Chairman BERSAT madah, fokus ke berat agi diberi ngagai kededua nengeri nya utai ketegal kbechiping.

Ku iya, Sarawak le ngembun pemesai baka Semenanjung Malaysia tinggal ari pemansang kelebih agi di menua pesisir baka ti di keearapka peranak dia.

“Ketegal nya siti polisi baru udah di bantaika perintah besai ungkup menua kitai lalu polisi baru tu dikena ki tai beratika chara ngagih pengaya enggau lurus sereta enda besiping, laban kami deka deka kitai sama mansang,” ku iya.

Nerang baru pasal polisi baru ti dibantaika nya pengudah Aum Khas Kabinet kena Hari Enam nyin tadi,pengawa bejalaika nya berindik ari polisi ti dibantaika sebedau tu.

Ku iya ari baruh polisi tu, sekali tu perintah besai deka nentuka rayat ti kurang benasit manah diberi peluang nyungkak Sosioekonomi enggau penetap, sida ulih ngena peluang ke diberi nya enggau manah.

“Kitai deka ke pengelantang ungkup semua tu mujur dijapai ba pengujung pengawa ti dikereja kitai, ukani ba pun...Sekali tu kitai deka nentuka ti kurang bernasit manah nya diberi peluang enggau siti penetap iya ngena peluang tu enggau manah, ukai dikena nyual lisin enggau kunterik (ke diberi) tang chakah ngereja nya kediri empu,” ku iya.

Taja pia ku Dr Mahathir, raban nya nadai pengulih enggau pengelandik, nya alai perintah deka meri latih, ngajar sentang ngaduka pekara wang, dagang enggau ke bukai ngambika ulih ngena peluang ke diberi nya enggau manah.

Ku Dr Mahathir baru, juluk nya ditusun manah ngambika mujur dipejalaika, tang ngarap rayat bisi meri sukung.

“Enti kita diberi peluang tang enggai nguji nambahka penau sida, gaya ke sebedau tu deka nyadi baka nya belama, tang enti nyanggup chakah matih diri sereta lurus ati enda masau semua peluang, tentu sida ulih ngangkatka pemujur diri.

“Semua tu ulih dikemujurka kitai laban perintah endang bisi ati deka gawa ke rayat tang rayat mega patut nyambut perambu tu ngambika ulih dikemujur,” ku iya.