Anda di sini

Urung 1,000 iku pesereta udah ngulu ‘Benak Road Trail Run 2019’

 Harden begambar kenang enggau sekeda ari pesereta ti udah ngambi bagi dalam program nya.
BEGULAI ENGGAU PESERETA: Harden begambar kenang enggau sekeda ari pesereta ti udah ngambi bagi dalam program nya.

SRI AMAN: Bisi 1,000 iku pesereta udah ngambi bagi dalam Benak Road Trail Run 2019 ti diatur Opis Kereja Raya (JKR) Bagi Menua Sri Aman ti bepalan ba Tebing Sungai Batang Lupar, Sri AMan ditu pagi kemari.

Benak Road Trail Run 2019 edisyen taun tu iya nya beserimbai enggau Pesta Benak Sri Aman ti deka diatur sepengelama tiga hari di Pasar Sri Aman berengkah 27 nyentuk 29 September tu ba Tebing Sungai Batang Lupar enggau Sungai Batang Lupar, Sri Aman.

Jurujaku pengatur program madah, pengawa ngatur Benak Road Trail Run taun tu udah nerima sambut ti manah ari peranak Sri Aman enggau peranak ari kandang menua luar Sri Aman.

Program ti dipejalai berengkah pukul 6.30 pagi udah dibagi ngagai dua kategori iya nya kategori Belanda 10 Kilometer enggau Tebuka sereta Veteran ungkup Lelaki enggau Indu.

Dulu agi ari nya, pengawa ngelepaska pesereta program tu udah dipenyadi Menteri Muda Pengelantang Pendiau, Komuniti, Pemansang Ruang Bilik enggau Nembiak Mit ti mega Kaban Kunsil Nengeri (ADUN) Simanggang Datuk Francis Harden Hollis.

Sama bisi datai ba program nya Residen Bagi Menua Sri Aman Indit Bangai, Pemesai Pelilih Sri Aman Mohd ashree Wee, Injinir Bagi Menua Opis Kereja Raya (JKR) Sri Aman Bujang Kanang, ketuai opis perintah di kandang menua ke bukai.

Beserimbai enggau nya, program nya udah dirichahka agi enggau pengawa Senamrobik.