Anda di sini

UNIFOR dipinta merambu gaji ninting bulan paderi di nengeri tu

 Edwin (enam ari kanan), Dr Ngenang (tujuh ari kiba), Richard (lima ari kanan), Dennis (empat ari kanan), August (lima ari kiba) sereta bala bukai maya Pengerami Makai Lemai Ngiga Turu GMIBA ba sebuah resturan ditu, ensana.
KENANG KITAI: Edwin (enam ari kanan), Dr Ngenang (tujuh ari kiba), Richard (lima ari kanan), Dennis (empat ari kanan), August (lima ari kiba) sereta bala bukai maya Pengerami Makai Lemai Ngiga Turu GMIBA ba sebuah resturan ditu, ensana.

SIBU: Unit Pekara Bekaul Pengarap Bukai (UNIFOR) dipinta merambu penemu deka netapka gaji ninting bulan ngagai paderi ba nengeri tu.

Sekretari Politik Kepala Menteri Edwin Banta madah, enti baka ustazah ari Opis Pengarap Islam Sarawak (JAIS) dibayar perintah nengeri gaji ninting bulan.

“Ba penemu aku UNIFOR tau meri gaji ngagai bala paderi kitai baka sida ustaz.

“Manah amat enti disebaka baka nya nambahka diatu kitai udah bisi UNIFOR,” pia ku iya madah maya ngarika Sapit Kepala Menteri Tan Sri James Masing maya ngulu Pengerami Makai Lemai Ngiga Turu Gerija Methodist Iban Bawang Assan (GMIBA) ba sebuah resturan ditu, ensana.

Sama bela datai maya tu iya nya Direktor UNIFOR Datu Dr Ngenang Janggu, Sapit Direkter UNIFOR Richard Lon, Chairman Opis Pekara Wang GMIBA ti mega Chairman komiti pengerami Tuai Rumah Dennis Ansam, Chairman GMIBA August Abett, Temenggong Wilfred Billy Panyau, Penghulu Evelyn Holly Sebom, Paderi GIM Bawang Assan Reverend Joshua Mangka sereta bala bukai.

Pengerami ke digulu lebih kurang 500 iku bala mayuh tu ngembuan tuju deka nyaup GMIBA nambahka turu gerija nya.

Taja pia, Edwin madah, nya semina penemu iya aja lalu nya bepanggai ngagai UNIFOR bejadika iya.

“Enti enda ulih nya enda ngawa. Aku semina madahka penemu aku aja nyangka ulih diperundingka,” ku iya madah baru.

Maya pengerami tu mega, Dr Ngenang madah, UNIFOR siti ari unit ba baruh Opis Kepala Menteri ti pegai Sapit Kepala Menteri Datuk Amar Douglas Uggah Embas.

Ku iya, penumbuh unit nya dikena nyaup pengarap bukai, ngemanahka agi nyengkaum perengkaguna institusyen pengarap sida.

“Kitai ukai semina nyaup pengarap Kristin tang mega pengarap bukai baka Sikh, Hindu, Buddha sereta ke bukai.

“Ba UNIFOR kitai mega nyaup sida ngiga endur pendam pengarap bukai ti begunaka saup,” pia ku iya.

Kelimpah ari nya, iya mega meri besai terima kasih ngagai Kepala Menteri Datuk Patinggi Abang Johari Tun Openg ti semampai nambahka penyampau bantu belanja ke diungkup ngagai UNIFOR ninting taun.

Ba pengerami nya Dr Ngenang besemaya deka mai peminta GMIBA ke deka minta sebuah agi begunan baru iya nya Palan Pelajar Methodist Bawang Assan ngagai Uggah.

“UNIFOR nerima peminta nya tang meseti dirandau dulu ngambika ditemu Uggah,” ku iya madah.

GMIBA ba pengerami tu bela nerima geran RM15,000 ari Masing lalu Edwin mega bisi nyuaka pemeri ari iya empu RM2,000.