Anda di sini

Raban nembiak diperansang meretika reti Hari Merdeka

 Ahmad Kamal (kanan) benung nyuaka tepa pengingat ngagai Ashree (tengah) maya program nya diatur ditu.
TANDA PENGINGAT: Ahmad Kamal (kanan) benung nyuaka tepa pengingat ngagai Ashree (tengah) maya program nya diatur ditu.

SRI AMAN: Raban nembiak diatu diperansang ngambika terus meretika reti kebendar Hari Merdeka lalu ukai semina deka ngibauka Jalur Gemilang sereta nyebut ‘Merdeka’.

Pemesai Opis Pelilih Menua Sri Aman, Mohd Ashree Wee madah, raban nembiak mega enda patut enda ngingatka tanggungpengawa bala ketuai suba dalam pengawa ti ngemansutka menua tu ari dikuasa orang menua luar.

“Mayuh raban nembiak kitai diatu enda tentu meretika sejarah merdeka menua sereta bala ke nyaga menua ti udah mayuh mantu dalam nentuka menua kitai merdeka.

“Ukai naka nya aja, mayuh raban nembiak kitai semina deka ngibarka Jalur Gemilang enggau nyebut ‘merdeka’ peneka ati tang enda meretika reti Hari Merdeka,” ku iya.

Iya ke ngari Residen Bagi Menua Sri Aman madah munyi nya lebuh bejaku maya bejadi Kimpin Jalur Gemilang Bagi Menua Sri Aman Taun 2019 ke diatur Opis Penyerakup Menua enggua Integrasyen Bansa Bagi Menua Sri Aman bepalan di Gelanggang Futsal, Kampung Tengah, Sri Aman ditu.

Ku iya, rebak biak patut nemu sejarah ke amat Hari Merdeka lalu beguna amat ba rayat menua tu ngenang semua tanggungpengawa ke udah dipejalaika bala ketuai dulu suba nyapai menua merdeka.

“Runding ti talukka menua diri patut dikembuan kitai rayat Malaysia enggau anang sekali kitai ngeruga Hari Merdeka enggau ngaga ulah ke enda patut.

“Ukai senang bala ketuai menua sida bejalaika tanggungpengawa nyaga menua dalam nentuka menua merdeka lalu tu mih maya nya kitai ngenang tanggungpengawa ke udah digaga sida,” ku iya nerang.

Ku Ashree agi, juluk deka ngiri sereta nerenakka runding ti talukka menua ba rebak biak amat patut kelebih agi dikena meransang penakluk patriotik ke mayuh nguna pengeransing enggau pengelikun.

Sama datai ba pengerami tu ya nya, Pemesai Opis Penyerakup Menua enggau Integrasyen Bansa Bagi Menua Sri Aman, Ahmad Kamal Malek sereta Chairman Kawasan Rukun Tetangga (KRT) Bagi Menua Sri Aman enggau Kaban KRT ke bukai.

Berebak enggau nya, program nya mega dirichahka enggau Senamrobik, Pekit Nyura Nembiak Mit, Ngias Kek Bepelasarka Bendira, Ubah Jalur Gemilang, pekit ngias KRT enggau bendira sereta pekit lagu  patriotik.