Anda di sini

PH ngetuka agih belanja, GPS neruska nya ke pemaik rayat

KUCHING: Mayuh projek pemansang ti udah diketuka perintah besai nya siti pekara ti bechiping ungkup rayat Sarawak kelebih agi ti diau di menua pesisir, ku Menteri Muda Pekara Korporat enggau Unit Komunikasyen Mensia Mayuh Sarawak Abdullah Saidol.

Laban ti siru enggau guna rayat, perintah Sarawak ku iya udah neruska projek ngaga dua jematan - Jematan Muara Lassa enggau Batang Paloh - ti deka nyadi jalai penyambung darat peranak Pulau Bruit enggau ngelingi nya.

“Tabi basa patut diberi ngagai perintah nengeri, kelebih agi Kepala Menteri Datuk Patinggi Abang Johari Tun Openg.

“Pengawa ngaga dua jematan nya udah ngayanka pengeransing sereta pemanah ati perintah nengeri ari baruh pegai Gabungan Parti Sarawak (GPS) dikena ngemansangka infrastruktur nengeri kelebih agi di kandang menua pesisir,” ku iya ba Pengerami Nyuaka Chek Pampas Jematan Batang Paloh ba Balai Kampung Semop kena Hari Enam tu tadi.

Iya ke udah nya mega ngarapka dua jematan tu ila nyema udah tembu ukai semina ngemuntangka pejalai tang mega meri peransang ngagai peranak Pulau Bruit ngambika produtif sereta ransing besemekih dalam ngangkatka sosioekonomi.

Berindik ari nya, raban nembiak ba Pulau Bruit dipinta ngambika besedia ngerebut peluang dalam nambahka penatai pemisi baka bejalaika pengawa betanam betupi moden, bedagang renchit, mekal asil betanam betupi enggau tasik sereta mega woksyop miki perengka pengangkut.

Abdullah ke mega Kaban Kunsil Nengeri (ADUN) Semop madahka pejalai projek nya mega enda nyadi nyata nyema nadai kerejasama ari orang ti beempu tanah ba palan endur jematan nya digaga.

Ulah nya mandangka sida endang meretika pemerat jematan nya ngagai guna peranak ba kandang endur nya.

Nitih ku iya, pengawa ngaga jematan nya mega nyadika kelai pengeransing, pengerajin enggau pemerani iya mantaika buah runding dalam ngarika peranak ti udah ngelempaika pengarap sereta tanggungpengawa ngagai iya.

“Aku enda kala besemayaka pemujur dalam pengawa aku, nama ti berat iya nya kurang bepolitik, tang mayuhka agi bekereja dikena ngamatka pengarap enggau peminta komuniti.

“Enda guna mega ninting maya besebana lalu seruran nyalahka orang bukai. Mekuhka ngagai pemansang lalu ngelangkar pemujur dudi hari ukai semina bejaku puang bekaul pekara dudi hari,” ku iya nerang.

Kelimpah ngangkatka sistem jalai, iya mega madahka pengawa ngangkatmanah infrastruktur baka bekal elekterik enggau ai mega deka diperati enggau bebendar nyengkaum ngaga baru sekeda sekula repuk,” ku iya.

Beserimbai enggau nya, iya minta mensia mayuh ngambika enda mudah tepejuh enggau orang luar ke ulih ngujungka komuniti pambar lalu jai runding.

“Nama ti patut kitai meseti seruran milih penegap runding sereta penemu ti mekuh ngagai pekara ke ulih ngerapitka kaul lalu nuju pemaik enggau ngemansangka diri,” ku iya.

Ba pengerami nya, bisi 42 iku orang ti beempu tanah udah nerima pampas tanah sepenyampau RM378,868 ungkup tuju ngaga jematan Batang Paloh.

Jematan Batang Paloh enggau pemanjai 1.7 kilometer udah berengkah digaga enggau ungkus RM298.98 juta lalu disadang tembu ba tengan taun 2023.

Iya mega udah nyuaka pemeri sepenyampau RM9,500.

Pemeri tu udah diagihka ngagai Gerempung Apai Indai enggau Pengajar (PIBG) Sekula Primari (SK) Kampung Betanak ti udah nerima RM2,000, PIBG SK Salah Kechil (RM3,000), Komiti (AJK) Surau Darul Taqwa Kampung Penipah (RM3,000) enggau Etana Buskers (RM1,500).