Anda di sini

Pesereta Kus NPQEL 2 Taun mujur bejalaika Program PAK 21 2019 di SMK Bau

 Semua pesereta ke udah datai ngulu Woksyop PAK 21.
NGIRI PENEMU: Semua pesereta ke udah datai ngulu Woksyop PAK 21.

KUCHING: Sekula Sekondari (SMK) Bau enggau kerejasama pesereta Program Kus NPQEL Ambilan 2 Taun 2019 ari Institut Aminuddin Baki (IAB) Pampang Sarawak mujur ngatur Program Belajar Abad ke 21 2019 (PAK 21 2019) bedau lama ti udah.

Program ti nyengkaum tiga aktiviti besai nya mai batang tuju dikena nambahka penemu enggau pengelandik ngajar ungkup bala pengajar ke efektif agi lalu bisi meri empas enggau ngadaka rampa ngajar enggau belajar ti ngerindang, efektif enggau bisi reti ngagai nembiak sekula.

Entara aktiviti semanjai program nya iya nya Licha enggau Woksyop PAK 21 begulai enggau dua iku Jurulatih Profesional Pemansang Sekula (SISC+) ari Opis Pelajar Pelilih (PPD) Bau, iya nya Wes Mirid enggau Marini Hussain.

Nitih ku engatur program, Lau Bee madah aktiviti nya mekuh ngagai 10 iku pengajar subjek Pom1B enggau 26 iku nembiak sekula Pom 1B.

“Pengajar Wes udah bekunsi bekaul pengerindang belajar PAK 21 nengah peneleba iya bejalaika mayuh program PAK 21 baka enam selapuk runding.

“Lalu pengajar Marini udah ngatur woksyop ‘hands on’ begulai enggau pengajar sereta nembiak sekula,” ku iya dalam siti penerang media kemari.

Iya madah Program PAK 21 nya mega bisi nyelepakka slot nyain Sempekat Pemereti Ati (MoU) entara PPD Bau enggau SMK Bau sepengelama tiga taun ungkup bekunsi pengawa ti pemadu manah bekaul PAK 21.

“MoU nya ti keterubah diatur lalu nyadi inisiatif timpuh panjai sekula dikena nerenakka pemereti ati ba bala pengajar bekaul pemerat PAK 21 dalam pengawa ngajar enggau ngemuntangka pengawa (Pdpc) kelas kelimpah ulih ngerapitka kaul entara pengajar enggau bala nembiak sekula,” ku iya.

Ungkup aktiviti kedua iya nya woksyop nyamai ngajar PAK 21, ku iya nambah, bisi 44 iku pengajar muakka lemai udah datai ngulu woksyop nya lalu dipejalaika pengatur program nya empu ti udah bekunsika peneleba bekaul semua aktiviti PAK 21 enggau pengawa ngatur fizikal kelas program nya.

Lau madah aktiviti ti udah digaga nya udah nerima sambut ti manah ari bala pengajar lalu dikearap ulih nambahka penemu sida bekaul bakani chara ngajar enggau ngemuntangka pengawa dalam kelas ke alai empas nya deka diasai bala nembiak sekula.

“Kitai mega ngarap nya ulih ngemeranka PAK 21 ungkup bala pengajar ke ulih nyungkak tikas pnyulut sekula dalam mayuh bidang seriris enggau juluk Program Transformasyen Sekula 2025 (Ts25) ti deka nempa sekula bekualiti enggau pemanah ulah nembiak,” ku iya nambah.

Kelimpah ari nya, aktiviti ketiga ti diatur nengah Program PAK 21 2019 iya nya Woksyop Ngenegapka PAK 21 nengau Komuniti Belajar Profesional (PLC).

Program nya ku iya, udah dipejalaika Pasukan Pemimpin Pertengahan ari baruh pegai prinsipal Patrick Nojey.

Lau madah iya endang puas ati enggau program nya laban mayuh ari pengajar enggau nembiak sekula udah meri timbal ti positif lalu nyukung aktiviti nya ti udah mujur meri pemanah ngagai aktiviti ke diatur ngelama tu.

Ba ujung woksyop nya, semua pengelicha enggau pesereta udah diberi setipikit meri basa enggau setipikit penyereta.

Iya madahka program nya udah mujur nyapai batang tuju kelimpah udah nyambung rentayan pekara ti berat dalam meri pemansang ngagai sekula.

“Pelajar kemaya hari tu udah bisi ubah ti dinamik lalu peminta guna udah ngansak dalam nyambut perambu dudi hari ti endang mayuh penguji.

“Raban ketuai di sekula, pengajar, nembiak sereta apai indai patut sama nyingkang lalu bela meri sukung ngagai pangan diri dalam ngemujurka program pelajar, kelimpah ulih terus nyikap diri enggau penemu sereta pengelandik ke diguna dikena betapi enggau Revolusyen Industri 4.0,” ku iya.

Iya udah meri tabi basa ngagai semua raban kelebih agi Prinsipal SMK Bau Patrick enggau semua raban di sekula nya, apai indai sereta orang bukai ke udah nyukung ari luar ti udah mantu ngemujurka program ke besai reti nya.