Anda di sini

Perintah nengeri seruran ngemeratka pemansang pelajar tumu nembiak mit

AWANG TENGAH
AWANG TENGAH

KUCHING: Perintah nengeri deka terus mnekuh ngagai pemansang pelajar tumu nembiak mit di nengeri tu kelebih agi nembiak mit begunaka bantu khas.

Sapit Kepala Menteri, Datuk Amar Awang Tengah Ali Hassan madah pelajar tumu nembiak mit beguna amat laban nya pelajar keterubah sida deka mujur dalam pelajar sekula.

“Nembiak begunaka bantu khas tu ngembuan pengelemi enggau pengelebih ti bebida.

“Bisi sida ke laun nguasa pelajar, pia mega begunaka perati enggau bisi nya ke pintar ngelui ari tikas umur sida.

“Ketegal nya kitai begunaka sukung semua orang nentuka nembiak beguna khas tu mega ngasaika pelajar ke patut,” ku iya.

Iya madah munyi nya lebuh bejaku maya Pengerami Nutup Randau Pemansang Tumu Nembiak Mit 2019 ke diatur di sebuah hotel tebilang ditu kemari.

Ku Awang Tengah nambah, dikena nyendiaka pelajar pemadu manah ungkup nembiak begunaka bantu khas tu endang ukai pekara ke mudah.

Perintah, ku iya udah ngungkupka bantu ngagai Institusyen Pelajar Tumu Nembiak Mit (IPAKK) dikena bejalaika kelas pelajar sekula tumu nembiak mit.

Pia mega ku iya, perintah nengeri udah megai tanggungpengawa enggau melanja penuh semua 82 tadika SeDidik lalu minta disediaka di semua kandang menua ti ukai semina ba mengeri aja.

Pekara tu endang begunaka belanja besai tang nya ukai nyadi penanggul ngagai perintah nengeri laban ba pekara pelajar sekula nya utai ke dikemeratka perintah.

“Perintah nengeri deka nulung naka ulih dalam pelajar sekula, nya kebuah kitai begunaka semua orang ba pekara tu nyengkaum apai indai enggau sektor peribit,” ku iya.

Sentang program randau nya, nya udah dipejalaika pengelama tiga hari berengkah 13 ngagai 15 September lalu udah disereta 556 iku pesereta ari raban pengajar enggau orang buan di intitusyen pelajar nembiak mit sereta sekula, NGO, volunteer sereta apai indai.

Semanjai timpuh randau tu, tiga forum enggau empat keretas kereja dibantaika bekaul enggau bidang pelajar tumu nembiak mit.

Program randau tu dikearap ulih ngangkatka peneleba, penemu sereta pengelandik bala pesereta dalam mantu nembiak ti begunaka bantu khas lalu matak mayuh agi Institusyen Pelajar Tumu Nembiak Mit (IPAKK) ari bemacham bengkah ejensi dikena ngemeranka polisi pintu tebuka.

Ba pengerami nya, Awang Tengah mega nyuaka setipikit penyereta ngagai pengari pesereta program randau ditangkanka pengawa nyua ‘Dana Endowment Sarawak’ (EFS) Zon Kuching sereta nyuaka geran ninting taun khas IPAKK Zon Kuching.

Sama datai iya nya, Menteri Pengintu Pengelantang Pendiau, Komuniti, Orang Indu, Ruang Bilik enggau Pemansang Anak Mit, Dato Sri Fatimah Abdullah.