MIRI: Pakej khas servis mobil enggau ‘fix-line’ ungkup Orang Timpang Pendiau (OKU) nyungkak penyereta raban nya ba dagang ‘online’ (e-dagang).
Ahli Dewan Negara Senator Alan Ling madah, nya entara juluk perintah Pakatan Harapan (PH) deka nambah penatai pemisi raban nya kelimpah ti ngaul sida dalam ekonomi digital.
“Perintah Pakatan Harapan endang amat siru enggau nasit OKU lalu deka naka ulih nentuka sida ngasaika pemaik revolusyen digital lalu ulih ngangkatka dagang ‘online’ sereta ulih ngangkatka dagang sida enggau bisi lebih ungkus efektif,” ku iya nerang.
Alan dikerandau lebuh ngulu aktiviti ke diatur Kelab Lions Miri Host enggau Bank OCBC di Gerempung Servis Penau Miri ensana.
Menteri Komunikasyen enggau Multimedia Gobind Singh madahka pengatur pengawa servis udah setuju deka nangkup peminta raban OKU dibayar nitihka penyampau ke patut.
Pengatur pengawa servis deka nyendiaka diskaun entara RM10 ngagai RM15 ungkup pakej servis ‘mudah alih’ pra bayar enggau pasca bayar.
Bisi mega diberi nya diskaun ungkup meli kuota internet tambah. Ba ‘talian mendam’ sida deka nerima diskaun RM10 ngagai RM44.
Bisi mega deka diberi ba pakej Streamyx, Unifi enggau pakej ‘Home Wireless’ ke dikearap ulih mantu ngerembaika dagang nengah talian sida.
“Tu meri mayuh pemaik ngagai raban tu laban dagang nengah talian amat manah ungkup sida,” terang iya seraya nambah pakej udah diberi berengkah 20 Jun tu tadi.
Sekretari Pakatan Harapan Sarawak madah, orang ke minta enggau orang ke nyaga sida patut mantaika kad pengelala enggau kad OKU dikena ngambi pakej nya di kompeni telekomunikasyen.