Anda di sini

Baru: RM128 juta diungkup ba program ngangkatmanah sekula repok di Malaysia

BARU
BARU

BINTANGOR: Opis Pelajar Malaysia (KPM) udah nyendiaka agih belanja sepenyampau RM128 juta ba taun 2019 nengah agih belanja pemansang dikena bejalaika program ngemanahka 43 buah sekula repok di serata Malaysia.

Menteri Kereja Raya Malaysia, Baru Bian madah, ari penyampau nya bisi 32 buah sekula repok nya di Sarawak.

Ba taun tu bisi RM100 juta agih belanja udah dibagi ungkup program tu di Sarawak, lalu 3 buah sekula di Sabah deka bulih agih belanja penyampau RM10 juta sereta 8 buah di Semenanjung Malaysia ke diungkup RM18 juta.

“Nyentuk diatu, ari semua 43 buah sekula nya, bisi 8 buah di Semenanjung Malaysia benung dalam diproses ngaga lalu kesemua 3 buah sekula di Sabah benung dalam renggat utai ke ulih digaga.

“Di Sarawak, ari 32 penyampau nya, bisi 30 buah sekula benung dalam proses ngaga enggau dua buah agi dalam renggat ngelangkar ke baru laban pemesai taba mit. Proses ngangkatmanah tu dipelaba deka ditender dalam bulan Oktober tu,” ku Baru Bian.

Iya madah munyi nya lebuh pengerami Nasih Tanah Dikena Ngangkatmanah Sekula Repok di Sekula Sekondari (SK) Mengeri Bintangor, kemari.

Sama datai ba pengerami tu nya Sapit Direktor Opis Kereja Raya (JKR) Sarawak, Sektor Begunan enggau Pengelandik, Ar. Stanley Chai ChinSiong, Pemesai Opis Pelilih Menua (PPD) Bintangor, Ismail Abang Mahmud sereta bala temuai dipebasa ke bukai.

Ba pengerami tu mega, Baru Bian madah, kelimpah ari nya, sepenyampau RM1 bilion diungkupka udah dikemendar kabinet ungkup ke dipejalaika udahnya ba program Pemansang Sekula Repok di Sarawak ke mungkur tiga fasa berengkah Ogos 2019 ngagai taun 2020.

Ku iya, dikena bejalaika Program RM1 billion Fasa 1, Opis Menteri Pekara Wang Malaysia udah setuju ngungkupka belanja RM350 juta ngagai 37 buah sekula repok di Sarawak ke deka dipejalaika dalam timpuh taun tu.

“Pengawa milih projek sekula repok ba taun 2019 tu nyengkaum kategori sekula ke beskala 7 enggau 6 ke alai gaya fizikal iya enda penuh, enda manah enggau enda likun dikena.

“Sekula tu udah dituku enda likun ari opis JKR enggau mega ari Opis Pelajar/Opis Pelajar Pelilih Menua.

“Sebagi besai ari projek ngaga sekula repok ba taun 2019 tu digaga ngena sistem ‘Industrialised Building System’ (IBS), nengah kunteriktor ke dipadu enggau chara tender tebuka,” ku Baru Bian.

Nitihka Baru Bian, kereja nukar enggau ngangkatmanah begunan repok enggau jai ngena teknologi IBS tu ulih ditembuka dalam timpuh ke pandak dibanding enggau chara konvensional.

Berebak enggau nya, ku iya, timpuh ngaga ke ditetapka ungkup projek sekula repok ngena IBS tu nya di entara 4 ngagai 6 bulan.

“Projek ngangkatmanah sekula repok 2019 di Sarawak, ke dipejalaika nengah agih belanja pemansang udah dibagi ngagai 12 iti pakej ke mungkur ngaga sekula repok di pelilih menua Betong, Saratok, Serian, Samarahan, Kapit, Julau, Bintangor, Tanjung Manis, Daro, Dalat, Kanowit, Limbang, Lawas, Bintulu, Belaga, Baram, Subis dan Miri.

“Projek di SK Bintangor tu sebagi ba baruh projek sekula repok ungkup pakej 5 ti nyengkaum dua buah sekula bukai iya nya SK Ulu Entaih Julau enggau SK Ulu Entabai.

“Projek pakej 5 tu udah dipejalaika Kunteriktor Tetuan Cekapplex Sdn. Bhd. nengah kunterik beungkus RM7,118,115.10 enggau timpuh ngaga pengelama 5 bulan berengkah 4 September lalu ditimpuhka tembu kena 3 Februari 2020,” ku Baru Bian agi.