Anda di sini

Anang nyalahka orang bukai nyema enda ulih ngamatka manifesto

 Hasidah lebuh dikerandau raban pemberita, ensanus.
ANANG NYALAHKA SAPA-SAPA: Hasidah lebuh dikerandau raban pemberita, ensanus.

KUCHING: Perintah Pakatan Harapan (PH) enda patut nyalah tauka nganu perintah ke suba tauka barang sapa lebuh enda ulih ngamatka semaya kelebih agi bekaul enggau manifesto Pakatan Harapan.

Menteri Muda ba Opis Kepala Menteri (Undang-undang, Kaul Nengeri-Perintah Besai enggau Pematau Projek) Sharifah Hasidah Sayeed Aman Ghazali madahka semaya ke digaga perintah PH nya udah tanggungpengawa sida iya empu.

Ku iya PH empu ke ngaga semaya enggau rayat sereta patut nanya diri empu nama kebuah semaya enda ulih dikeamatka.

“Nuan(PH) enda ulih nyalah tauka nganu rayat nuan enda ulih ngamatka nya.

“Ba penemu aku nuan (PH) patut megai tanggungpengawa. Enti nuan enda ulih ngamatka nya nuan nadai ulih ngereja sebarang utai kelebih agi manifesto.

“Nuan (PH) enda tau nyalah tauka nganu perintah ke sebedau tu tauka barang sapa,” ku iya lebuh dikerandau raban pemberita pengudah iya ti datai ngulu pengerami bejadika program CENTEXS-SMA SAFARI 2019 ti diatur ba Penview Convention Centre Demak ditu, ensanus.

Hasidah mansutka pekara nya lebuh ditanya bekaul enggau penerang Menteri Wang Lim Guan Eng ti madah isu ke ditinggalka perintah sebedau tu nyadi nya ti nagang bejalaika semaya ti digaga ari baruh maniefesto Pakatan Harapan, lebih agi bekaul enggau royalti minyak ngagai Sabah enggau Sarawak.

Bepelasarka ripot Bernama, Lim madahka perintah sebedau tu ngunjungka sepenyampau belanja besai ti ngujungka Malaysia betapi enggau penanggul.

“Kita bejakuka pasal belanja RM15 bilion, nya ukai mimit. Tu udah tentu meri pemar ngagai perintah bejalaika tauka ngamatka semaya.

“Dalam timpuh ti sama, aku arap bendar perintah deka madahka chara ti patut dikena nunjukka pengawa ngemeratka Sabah enggau Sarawak enda tendur,” ku iya jaku diambi ari Bernama.