Anda di sini

Perintah nengeri deka bebendar ngemansangka aspek parit, entali ai

 Abang Johari meri terima kasih ngagai Datuk James Chan (dua kanan) enggau Datuk Abang Abdul Wahap Julai (dua kiba) seraya dikemataka Dr Sim (kanan) enggau Jaul (kiba). — Gambar Chimon Upon
TERIMA KASIH: Abang Johari meri terima kasih ngagai Datuk James Chan (dua kanan) enggau Datuk Abang Abdul Wahap Julai (dua kiba) seraya dikemataka Dr Sim (kanan) enggau Jaul (kiba). — Gambar Chimon Upon

KUCHING: Perintah nengeri deka mekuh dalam ngemansangka aspek parit enggau entali ai kelebih agi ba kandang mengeri.

Berindik ari pekara nya perintah nengeri nitih ku Kepala Menteri Datuk Patinggi Abang Johari Tun Openg udah ngaga pemutus magi Opis Parit enggau Entali Ai (DID) ngagai dua entiti ti kediri.

“Kami udah ngaga pemutus deka magi DID nyadi dua. Siti ari baruh Datuk Amar Douglas Uggah Embas ti lebih mekuh ngagai entali ai sereta ungkup parit ari baruh Datuk Dr Sim Kui Hian.

“Pengawa magi DID tu deka meri awak ngagai kitai lebih numpu tauka fokus ari segi pelin besai saliran lebih agi di pusat bandar.

“Enti enda selalu sebat lalu ke sekali tu kitai deka lebih mekuh ngagai pengawa ngemansangka sistem parit di mengeri,” ku iya lebuh bejaku ba Malam Penghargaan Mantan Datuk Bandar Kuching Selatan enggau Mantan Datuk Bandar Kuching Utara ditu, ensanus.

Ke tuju nya ku iya, perintah nengeri deka masang gajet pengelikun pemadu baru ba kandang endur ti ditapat mensia mayuh baka Tebing Ai Kuching dikena bulih impak tauka timbal ari raban bansa.

Kelimpah ari nya ku iya perintah nengeri mega deka numpu ngagai perengka pengangkut mensia mayuh di mengeri besai tu.

“Aku udah numbuhka opis menteri khas ke ulih meda pemansang perengka pengangkut mensia mayuh kitai ari baruh Datuk Lee Kim Shin sereta deka mekuh bakani kitai ngatur trafik enggau ngemansangka chara baru ungkup jalai ti lantang ngagai penguna jalai alun.

“Tu tiga pekara ti aku deka dipejalaika ungkup Kuching jemah ila enggau ngarapka raban bansa  mengeri besai deka meri kerejasama ngagai kededua datuk bandar baru dikena neruska pengawa ex-datuk bandar sebedau tu,” ku iya.

Ba pengerami nya Abang Johari ngarika perintah nengeri meri terima kasih ngagai kededua ex-datuk bandar laban ti udah meri servis manah ngagai Kuching Utara enggau Kuching Selatan.

Kededua ex-datuk bandar ku iya, udah bejalaika kereja enggau manah sereta mai mayuh ubah ngagai pemansang Kuching Utara enggau Kuching Selatan.

Berebak enggau tu iya mega ngelaluka datuk bandar baru iya nya Datuk Wee Hong Seng (Kuching Selatan) enggau Datu Junaidi Reduan (Kuching Utara).

Abang Johari pechaya kededua datuk bandar ti baru deka bejalaika pengawa enggau lebih manah bepelasarka peneleba ti mayuh ke dikembuan.

Sama datai Menteri Kaunsil Kandang Menua enggau pengawa Berumah Datuk Dr Sim Kui Hian enggau Sekretari Perintah Nengeri Datu Jaul Samion.