Anda di sini

CENTEXS deka bisi palan betanam betupi pintar di kampus Mukah

 Abang Johari beratika sayur ti ditanam ngena chara hidroponik ke bisi dipandangka ba kelas CTOP ti diatur nyerumba CENTEXS-SMA SAFARI 2019, kemari.
BETANAM BETUPI PINTAR: Abang Johari beratika sayur ti ditanam ngena chara hidroponik ke bisi dipandangka ba kelas CTOP ti diatur nyerumba CENTEXS-SMA SAFARI 2019, kemari.

KUCHING: Pusat Kecemerlangan Teknikal Sarawak (CENTEXS) deka bisi palan betanam betupi pintar (pertanian pintar) ti deka dikemansangka ba kampus Mukah.

Kepala Menteri Datuk Patinggi Abang Johari Tun Openg madahka, CENTEXS di Mukah nya deka berengkah dibuka enti pengudah pengawa ngaga palan nya tembu ila.

“(Di Mukah) Kitai udah ngemansangka prasarana betanam betupi pintar ari baruh Palan Pemansang Pengelandik Sarawak (PPKS) tang diatu nya diambi CENTEXS laban nya lebih senipak enggau teknologi ti dikemansangka CENTEXS.

“Diatu rumah tauka kampus nya benung digaga. Enti udah tembu ila, CENTEXS Mukah deka dibuka ngagai nembiak.

“Pengawa ngaga palan nya dipelabaka ulih tembu dalam 18 bulan,” ku iya ti enda nyebut ungkus belanja dikena ngaga CENTEXS Kampus Mukah nyadi palan betanam betupi pintar.

Abang Johari mansutka pekara nya lebuh dikerandu raban pemberita pengudah bejadika CENTEXS-SMA SAFARI 2019 ti diatur CENTEXS enggau Sarawak Multimedia Authority (SMA) ba Penview Convention Centre Demak ditu, kemari.

Lebuh ti ngenang pasal CENTEXS-SMA SAFARI, Abang Johari madahka program nya ambis nadai ulih mantu meri penyedar ngagai pesereta pasal pemesai guna teknologi dalam dunya moden diatu.

Dulu ari nya Charman CENTEXS Tan Sri Datuk Amar Mohamad Morshidi Abdul Ghani dalam jaku pengelalu madahka, CENTEXS nyambut misi Kepala Menteri ti deka mai transformasyen dalam bidang betanam betupi.

Ku Morshidi, CENTEXS deka mai ubah sereta ngemeranka chara betanam betupi pintar ke ulih mai pemansang sereta ngangkatka penatai pemisi orang bekebun tauka betanam betupi di nengeri tu.

“Betanam betupi pintar mega dikelala enggau revolusyen gadung ti ngemeranka teknologi pemadah enggau penyungkak dalam bidang betanam betupi.

“Nya alai, CENTEXS enggau kerejasama IBM deka ngaga beberapa program ti bepelasarka betanam betupi pintar ungkup raban biak di Sarawak.

“Aku deka madah ngagai semua, Kepala Menteri udah besetuju CENTEXS ngambi kampus (PPKS) di Mukah sereta ngemeranka tauka ngemansang betanam betupi pintar,” ku iya.

Morshidi lebuh ti ngenang pasal program CENTEXS-SMA SAFARI, iya madahka tuju program nya dikena ngelakuka program latih teknikal, digital enggau pesaka Sarawak kelimpah ari nerang ngagai orang biak bekaul enggau nama tanggungpengawa SMA dalam mantu juluk perintah nengeri ngemansangka landskap nuju ekonomi digital.

CENTEXS - SMA SAFARI 2019 udah diatur ba Dalat/Mukah, Betong, Lundu, Lawas, Long Busang, Batu Kawah enggau Sri Aman berengkah ari pun bulan Februari tu tadi.

Entara aktiviti ke bisi diatur sepemanjai pengerami tu diatur iya nya baka Ceramah Latihan Teknikal CENTEXS, Ceramah Latihan Digital CENTEXS, ceramah ari SMA, sesi forum: Ekonomi Digital di Sarawak, ceramah ari Cyber Security Malaysia, ceramah ari Lazada enggau EC-Council Global Servicea (EGS).

Nyerumba pengerami tu biai diatur Community Technical Outreach Programme (CTOP) ti mungkur enam kursus iya nya Kursus Welding:Asas Pengenalan Kimpalan SWAW &GMAW: Kursus Digital: Asas Pengenalan Diri: Kursus Elektrikal: Asas Pendawaian Lampu Automatik: Kursus Tailoring: Asas Sulaman Keringkam, Kursus Argriculture:Asas Pengenalan Tanaman Hidroponik enggau Kursus Masakan:Asas Pembuatab Mee Jawa. Kursus ti dipasuk 106 iku pesereta ke datai ari kandang enggau ngelinggi menua kuching.

Bisi datai Menteri Muda Pekara Islam enggau Dewan Bandaraya Kuching Utara Datuk Dr Abdul Rahman Junaidi, Menteri Muda ba Opis Kepala Menteri (Undang-undang, Kaul Nengeri -Perintah Besai & Pemarau Projek) Sharifah Hasidah Sayees Aman Ghazali, Kaban Kunsil Nengeri (AdUN) Demak Laut Dr Hazland Abang Hipni, ADUN Tupong Fazzrudin Abdul Rahman, Pengurus Besar CENTEXS Commercial Services Mohd Shahren Mohamad Yusri enggau ke bukai.