MIRI: Opis Kampung Sarawak (JHS) dalam timpuh 100 taun udah mujur ngintu asil kampung nyentuk ke meri sida ba tikas ti ngemegahka ati diatu.
Menteri Perengka Pengangkut, Datuk Lee Kim Shin madah, JHS udah nengah jalai ti panjai dikena datai ba tikas diatu enggau megai tanggungpengawa ke besai dalam ngatur sereta ngintu asil kampung bepelasarka ‘Perlembagaan Kawasan Terlindung Sepenuhnya’ (TPAs) enggau ‘Simpanan Hutan Kekal’ (PFEs) kelimpah ti pengawa neritka atur ordinan.
“Tanggungpengawa tu ukai pekara ke mudah tambah mega Sarawak ngembuan kampung ti besai.
“Tang ba penguji tu, JHS mandangka nadai utai ke enda ulih lalu nya ulih dipeda nengah pemujur sida semanjai timpuh 100 taun,” ku iya bejaku lebuh bejadika ‘Forest Fun Run 2019’ Miri di Piasau Nature Reserve Miri (PNR) bedau lama ke udah.
Bisi urung 800 iku pesereta ari sektor korporat, perintah, peribit enggau individu bisi nyereta dalam program belanda ‘5KM Forest Fun Run’ di PNR beserimbai enggau ngintu ke-100 taun penumbuh Opis Kampung Sarawak (JHS) nya.
Renggat keterubah program belanda tu diatur di Bintulu ditangkanka Miri lalu udah nya diatur di Sibu, Sarikei enggau Kuching.
Lee madah, pengawa ke milih PNR nyadika palan ngatur program belanda nya patut laban taman nya ke bepalan ba kandang mengeri nya nyadi rumah nyaga urung 107 bansa utai tumbuh enggau 75 bansa jelu nyengkaum burung enggang.
“Program beanda nya sepenyauh 5 kilometer meri peluang ngagai pesereta ngasaika pemanah rampa menua enggau tasik. Aku beterima kasih ngagai semua pesereta ti udah ngemujurka program tu,” ku iya.
Seratus iku pelanda deka nerima paung kayu ungkup ditanam di kandang endur PNR ke alai tetiap kayu nya diukir enggau nama pesereta nyadika pengingat program nya.
Kelimpah ari nya, midul ungkup bala pelanda mega mandangka kayu Tapang, ke asal nya semina tumbuh di pulau Borneo.
“Kayu Tapang nya sinonim enggau pengetan ti tegap, tan lama lalu ngembuan akar ke entap.
“Aku ngarapka JHS deka terus baka kayu Tapang – kering, tan, lalu entap dalam ngintu asil kampung di Sarawak,” ku Lee.
Sama bisi datai Menteri Muda Dagang Temuai, Seni enggau Main Asal Datuk Sebastian Ting, Datuk Bandar Miri Adam Yii, Direktor JHS Hamden Mohammad enggau bala pengari opis enggau sektor ke bukai ditu.