Anda di sini

Perintah Sarawak milih mutarka isu tanah NCR nengah chara politik

Advertisement

KUCHING: Sapit Kepala Menteri,Datuk Amar Douglas Uggah Embas berasai sinu meda pemutus kort federal ti nulak peminta nyerenih baru kes ti bekaul tanah NCR   Tuai Rumah Sandah enggau Siew Libau.

Ku Uggah madah ngagai The Borneo Post kemari, pemutus Kort Federal kena Hari Tiga tu tadi meri kebuah Perintah Sarawak udah milih chara mutar isu tanah asal nya nengah politik.

Nengah chara politik, Menteri Betanam Betupi Moden, Tanah Asal enggau Pemansang Kandang Menua nya  madahka Perintah Sarawak milih ngubah Undang – Undang Tanah Sarawak.

Nya kebuah (Ubah) Undang – Undang Tanah Sarawak 2018 digaga ngambika meri empas ngagai pengering undang – undang adat baka Pemakai Menua enggau Pulau Galau (PMPG) sereta ‘native territorial domain (NTD) ngambika diempu belama, ku iya.

Ubah ungkup undang- undang tanah nya diteritka berengkah ari 1 Ogos 2019.

Sebedau undang- undang nya dipejuraika, Uggah madahka  perintah nengeri betapi enggau dua pilih iya nya nengah undang – undang tauka diputar nengah chara politik.

“Enti kami milih nengah chara undang – undang, kita  meda bakani pemutus kena Hari Tiga nya (pemutus kort federal).”   “Nama penyadi, kitai (Dayak) lenyau abis utai. Nya mih kebuah kami milih nengah chara politik dikena nyelamatka Pemakai Menua enggau Pulau Galau  kitai ari pemutus kort ti ngenyinuka ati,” ku Uggah

Uggah, ke mega Kaban Kunsil Nengeri Bukit Saban  madah, enti penanggul tanah adat nya dilempai ba kort, nya deka dikuasa orang ari luar.  

“Nya kebuah kitai bisi Kepala Menteri ti meri terima kasih ngagai ubah undang – undang sereta meri Pemakai Menua enggau Pulau Galau, pengering undang-undang. Tu mih penaluk (Ubah) Undang – Undang Tanah  2018,” ku iya nyemetak.

Iya nyebut pekara nya lebuh ke ngenang ex- Kepala Menteri, niang Pehin Sri Adenan Satem enggau ke diatu, Datuk Patinggi Abang Johari Tun Openg.  

Ku Uggah,dua seminar deka diatur nengeri di Kuching enggau Sibu bejurut ba haribulan ti deka ditetapka ila, dikena nerang sentang konsep undang – undang bakani deka minta NTD. Sida udah ngatur siti di Miri, ku iya.

Kena Hari Tiga tu tadi, maya pechara ba Kort Federal di Putrajaya, dalam 4-1 pemutus majoriti madahka pelasar kebuah kort deka nyerenih baru pemutus ke sebedau tu.   

Ba pechara kena 27 Mei 2011, Kort Tinggi madahka Tuai Rumah Sandah enggau komuniti iya bisi tanah NCR ti lebih ari 5,639 hektar ke disuwa Perintah Nengeri Sarawak ngagai sebuah kompeni.   Ba kes tanah Siew Libau, tanah ke diperebutka nya bisi 11,822 hektar.

Bisi urung semilan buah rumah panjai udah nyaman kompeni nya, tang Kort Tinggi madahka semina rumah panjai Siew udah mujur numbuhka hak tanah adat asal.  

NCR nya diturunka ari kelia bepelasarka adat ari PMPG.

Pulau Galau reti nya tanah ke digalau alai peranak menua nya ngiga pemakai baka ngasu berikan enggau ke bukai.Tanah nya kebendar iya enda ditegu ngambika nyadi kampung.      Pemakai Menua reti nya kandang ba genturung pendiau ti dianggap nyadi reta. Nya nyengkaum kandang tanah rumah panjai sereta Pulau Galau.

Pemutus Kort Tinggi di Sibu udah nya lalu ditukuka Kort Apil.

Taja pia kena 21 Disember 2016, Kort Federal matak baru pemutus kededua Kort Apil enggau Kort Tinggi, ti ngenadaika prinsip tanah NCR ngagai Tuai Rumah Sandah, ke nyadi Tuai rumah ngagai urung 30 ruang bilik, enggau Siew.

Advertisement