KUCHING: Perintah nengeri Sarawak nyukung pngeransing positif sektor peribit dalam ngatur mayuh macham bengkah aktiviti dalam pengeran nyadika Mengeri Besai Kuching nyadi palan ke manah sereta matak mensia mayuh datai ke mengeri tu.
Menteri Dagang Temuai, Seni, Main Asal, Nembiak, Lumba enggau Main Datuk Abdul Karim Hamzah madah Kuching diatu udah nyadi palan orang ke ngemeranka pengerindu seni.
"Kuching diatu majak narit ati enggau ngembuan mayuh orang ke rindu sereta ngemeranka seni ari sektor peribit.
"Perintah nengeri nyukung aktiviti bansa tu seriris enggau pengeransing dikena ngangkatka Kuching nyadi sebuah mengeri besai ti ngerinduka ati laban mayuh raban orang biak enggau tuai ke rinduka seni.
"Nengah nya sida begulai ulih bekunsika penemu lalu nyadika Kuching manah agi,” ku iya bejaku ba pengawa Mandangka Fesyen RIMBA di Titanium Tower, Saradise ditu bedau lama ti udah.
Tambah iya, ba taun tu, perintah nengeri udah ngelancharka Kimpin Nemuai ke Sarawak, lalu kenyau beberapa bulan ke udah mayuh aktiviti udah dipejalaika baba teater, mandangka fesyen, lumba main enggau mayuh agi.
Pia mega dalam timpuh dua bulan agi deka diatur 'Spartan Race' iya nya aktiviti lumba ekstrim ari menua Amerika Syarikat lalu bisi 3,000 penyereta disadang ngambi bagi ari serata dunya.
Nyentuk ke minggu nyin kemari ku iya, sida udah mujur ngumpul sepenyampau 2,600 penyereta lalu 60 persen ari pesereta nya orang luar ke datai ari serata dunya.
"Nyadi siku menteri aku sigi rinduka pengerembai tu lalu nya patut diteruska.
"Lumba ekstrim tu nyadi siti ari gaya pengidup maya ke diatu lalu perintah nyukung program bakanya laban nerima penyereta ke manah ari serata dunya,” ku iya nambah.
Orang ke bempu hotel, homestay, pengempu resturin enggau orang ke ngemeranka pengelandik jari ulih nyungkakka penatai pemisi sida nengah penatai bala temuai dibanding taun dulu ke datai ngagai Sarawak.
Berebak enggau nya mega nyungkak penatai pemisi ekonomi Sarawak dalam sukut dagang temuai.
Ba pengawa ke sama Ketuai Direktor Operasyen Saradise Sdn Bhd, Dylan Yee madah pengawa mandangka fesyen RIMBA Saradise Gallery nya udah diatur sepengelama dua hari lalu tembu kemari.
"Nya keterubah iya asil lukis ba kain kanvas dijadika tengkebang nyadi ke asil gari nyelai,” ku iya.
Entara orang ke landik ngelukis ke udah nyereta iya nya Sebastian Jong, Faizuan Mat, Norman Choo, Narong Daun, Angelina Bong, Gerald Goh, David Chew, Slyvester Jussem, Sheila Kho enggau Mary Ann Vaz
Penengkebang fesyen ke mega udah nyereta program nya baka Dewi Khalid, Sonia Chong, Emil Hamlyn, Effie Jefferyson, Neng Kho Razali, Melissa Tiong, Azizah Razak, Antonia Isabelle, Steffi Debra, Danish Hakeem, Sasha Namara, Wini Coope, Hafiz Dressmaker, Rose Awing Belare enggau Aizat Rahman.
Semua asil tengkebang nya nitihka rambai jaku ke rampa menua nya udah dipandangka 30 iku model menua tu empu.