SIBU: Perintah nengeri deka berundingka pekara bekaul meri duit pampas ngagai ruang bilik 21 iku raban Iban Trackers ti udah midang di Semenanjung Malaysia enggau Singapura lebuh ti ngeleban komunis maya jeman ‘darurat’.
Sapit Ketuai Pampang Gerempung Veteran Raban Soldadu Malaysia (PVATM) Jimbau Galau madah, pengeransing nya dikena ngayanka penyiru perintah nengeri ti seruran ngenang pengawa sereta pemerani raban ‘Iban Trackers’ ke udah bebendar ngetanka menua dulu suba.
“Laban kitai agi dalam ‘mood’ ngintu Bulan Merdeka, endang engkeman nyema perintah berunding deka meri pampas ngaga ruang bilik raban Iban Trackers,” ku iya lebuh ti ditemu kemari.
Ku Jimbu madah, taja sida udah lama midang tang pemerani sereta pengeransing sida lebuh misyen ngelaban komunis endang patut seruran dikenang.
Ku iya, enda mayuh entara kitai diatu ti nemu pemerani enggau pengeran sida (Iban Trackers) ti sanggup ninggalka ruang bilik sida di Sarawak laban ti mantu soldadu British ngelaban komunis di Malaya enggau Singapura maya jeman beperang suba.
Kena 21 Julai 2011 rangkah 21 iku Iban Trackers udah ditumbak baru ba siti taba pendam Kristian ti enda jauh enggau Gerija St Joseph ba Kuching.
Semua 21 iku Iban Trackers iya nya niang Ungkok Jugam, FF/829 Jaweng Jugah, 900506 Unggat Ujom, 900172 Ugap Utut, 900601 Letan Kusing, 900665 Nyambik Pasang, 900815 Kumpang Tinggi, FF/253 Bulan Kasau, FF/1254 Kelambu Gadung, FF/575 Untang Engan, Rejap Bagi, FF/825 Entap Tulu, FF/1083 Nyantau Juna, Manit Cheling, Nyaru Talap, Mat Akit, Empati Dugu, Adrain Tandang, BS Utot Tanggang, 900557 Dampi Berain sereta 900441 Janggak Ingkoi.
Rangkah sida udah diambi ari pendam asal ba Alor Setar, Kedah (siti); Batu Gajah, Perak (dua); Kamunting, Perak (empat); Cheras, Kuala Lumpur (empat); Terendak, Melaka (lapan); enggau Kranji, Singapura (dua).