KUCHING: Pemutus Kort Federal ti nulak peminta nyerenih baru orang ke nuntut Tanah Hak Adat Bumiputera (NCR) Tuai Rumah Sandah ba pemutus ke digaga kort nya empu, meri reti sentang isu sekalika ‘Pemakai Menoa’ enggau ‘Pulau Galau’ bisi kuasa undang-undang tauka endang bedau bisi saut.
Chairman Parti Keadilan Sarawak (PKR) Baru Bian madah, sekeda kes penyarut Tanah NCR ke sama enggau kes TR Sandah ditangguh laban ke nganti pemutus ti dianti-anti dalam kes nyerenih baru nya.
Ba penemu iya, Kort Federal patut ngena prinsip dalam kes Nor Anak Nyawai, laban nya mengkang undang-undang ungkup pekara tu ti nyaut tanya nya ngarika orang ti nuntut.
Ku iya, pemutus nulak pengawa nyerenih baru nya mega meri reti ke alai peranak asal Sarawak enda tau enda seruran negi sereta nuntut hak sida ba Tanah NCR nyentuk kes sama ke bukai ba Kort Federal ngaga pemutus ti nyata ba kes Nor Anak Nyawai dikinsil tauka ditulak.
“Nengah pemutus nulak peminta nyerenih baru nya, reti iya sekeda isu ti deka kitai minta diterang sereta ditentuka, sekalika’Pemakai Menua’ enggau ‘Pulau Galau’ (NCR ke atas tanah di Sarawak) bisi kuasa undang-undang, mengkang enda disaut.
“Aku asa amat enggau pemutus Kort Federal ti nulak Peminta Nyerenih Baru bala plaintif Bansa Asal dalam kes TR Sandah baka ke diripot dalam berita enggau media.
“Taja pia, aku bebasaka kuasa ti diberi ngagai Kort ti ngaga pemutus nya ari baruh undang-undang,” ku iya ba sebengkah penerang ensanus.
Tambah Menteri Kereja Raya nya, iya nemu sekeda kes bekaul isu ke sama udah diberi Kort Federal ngambi bejuraika nya baru tang ditangguh sementara nganti pemutus kes TR Sandah ba Kort Federal.
Laban pemutus tu nulak kes tau dianggap nyadi ke bendar iya ‘Nadai Pemutus’ sentang isu ke bekaul, Baru ngarapka sekeda kes ke ditangguh dikemendar dipejuraika ngagai Kort Federal enda lama agi ngambika pemutus ti nyata ulih digaga.
Tu patut dikelengkas sereta patut laban pengawa ngakim Tan Sri David Wong ari Sabah ti enda sepenemu enggau pemutus Kort. Kort Federal di Putrajaya ensanus ngaga pemutus ke bisi kebuah ungkup peminta nyerenih baru ti dipadahka nadai pelasar enggau merit laban nya kes ngapil lalu ukai nyerenih baru.