Anda di sini

Infrastruktur digital deka dikemanah

Advertisement
 Hermit ba Pekit WMS 2019  nerima perais Anugerah Tangan Emas - Tropi Kepala Menteri ti disuaka Abang Johari sereta disempulang Manyin. — Gambar Chimon Upon
LANDIK: Hermit ba Pekit WMS 2019 nerima perais Anugerah Tangan Emas - Tropi Kepala Menteri ti disuaka Abang Johari sereta disempulang Manyin. — Gambar Chimon Upon

KUCHING: Perintah nengeri deka nyendiaka infrastruktur komunikasyen ti deras sereta ‘real time’ awakka ulih belajar teknologi pemadu baru.

Kepala Menteri, Datuk Patinggi Abang Johari Tun Openg madahka perintah nengeri deka ngangkatka pemanah infrastruktur digital laban begunaka peneras enggau real time.

“Perintah Sarawak, aku enggau bala bakih aku deka nyendiaka infrastruktur awakka kitai ulih belajarka teknologi ti pemadu baru.

“Diatu telefon kitai bisi tauka lebih ngagai 4G, tang diatu kitai deka ngangkatka ngagai 5G sereta komunikasyen lebih real time.

“Lebuh kitai bisi infrastruktur nya kitai ulih belajarka matapelajar ti chukup strategik ungkup Revolusyen Industri 4.0,” ku iya lebuh bejaku ba pengerami nutup Pekit WorldSkills Malaysia Sarawak 2019 ti diatur ba BCCK ditu, kemari.

Berebak enggau tu Abang Johari ngelalau bala nembiak iya nya kereja jemah ila deka berubah, nya alai patut nyikap diri sereta pekara ti dikena nyikap diri nya bisi dalam kurikulum.

Ba Sarawak bisi baka CENTEX enggau Palan Pemansang Pengelandik Sarawak (PPKS) ti nyendiaka pelajar teknologi, ku iya.

Nambahka nya ku iya universiti baka Swinburne, Curtin, UiTM, UNIMAS bisi fakulti ke nguji pasal subjek sains enggau teknologi, tang pelasar iya enda tau enda nemu pasal Sains ambis nadai nemu pasal fizik.

Abang Johari lebuh ke ngenang pasal Pekit WMS nya ngarapka bala nembiak ulih ngangkatka pengelandik diri empu ti ulih meri penguntung ngagai diri empu sereta mantu nyaup nengeri nyapai juluk nyadi menua maju lebuh manggai 2030.

Pekit World Skills Malaysia Sarawak (WSMS) 2019 edisi kedua diatur 9 ngagai 13 September, ke alai bisi 15 bidang dipekitka dibandingka enggau semina 11 bidang ba edisi keterubah diatur ba taun 2017.  

Lima belas bidang nyengkaum welding, ngelekatka elekterik, masang bata, nyura enggau ngias, berapi, ngenyelap enggau airkon, teknologi automobil, mutarka rentayan IT dikena bedagang, teknologi web, rentayan IT sistem ngaduka pengawa, teknologi fesyen, terapi pemajik, ngaga bok, servis restoran enggau desain Teknikal CAD.

Pekit dipasuk nembiak ari Institut Latihan Kemahiran Awam (ILKA) enggau Institut Latihan kemahiran Swasta (ILKS), universiti perintah enggau peribit ari serata Sarawak kelimpah ari tebuka ngagai orang biak beumur 21 taun ke baruh ke udah gawa tang bisi pengelandik.

Lalu pemenang ba semua kategori nya , lumur satu perais mata duit RM3,000, midul enggau setipikit penyereta; lumur dua ( RM1,500, midul enggau setipikit penyereta) enggau lumur tiga bulih perais RM1,000, midul enggau setipikit penyereta.

Lalu gelar pemadu tinggi ke diberi ba Pekit WMS 2019 iya nya Anugerah Tangan Emas - Piala Ketua Menteri, ti bulih perais RM5,000,tropi enggau setipikit.

Gelar nya dimenang Hermit Dominic ari ILP Kota Samarahan. Hermit mega teulihka lumur satu ba kategori welding. Sama bisi datai ba pengerami nya kemari Menteri Pelajar, Sains enggau Pansik Teknologi Dato Sri Micheal Manyin Jawong enggau Menteri Muda Dr Annuar Rapaee sereta bala menteri, menteri muda enggau pemesai ke bukai.

  • oleh
  • Advertisement