Anda di sini

Sitak Kunsil Nengeri Dudong enggi SUPP

 Dr Wong (kiba), Tian (lima kiba) enggau bala bukai maya aum media di Sibu.
ENGGI KAMI: Dr Wong (kiba), Tian (lima kiba) enggau bala bukai maya aum media di Sibu.

SIBU: Parti Sa’Ati Rayat Sarawak (SUPP) Dudong ngetanka penemu madahka penuduk Kunsil Nengeri (DUN) mengkang enggi sida.

Sapit Sekretari SUPP Dudong Dr Wong Chya Wei madah, sejarah sebedau tu nyata madahka penuduk Dudong endang pegai SUPP.

Nya alai ku iya, SUPP endang enda ngelakka penuduk nya diambi parti bukai enggau jalai muntang.

“SUPP enggau Parti Progresif Demokratik (PDP) parti komponen dalam Gabungan Parti Sarawak (GPS) dua iti parti tu bebakih.

“Ketegal ke bebakih, kitai enda tau ngeruga tauka tama ngagai penuduk orang bukai kelebih agi maya pengawa bepilih nengeri deka diatur enda lama agi,” pia ku iya madah maya aum media ditu, kemari.

Dr Wong madah, PDP meseti ngena prosedur ke betul nyema sida endang beamat nganjung chalun sida bediri ba penuduk enggi SUPP.

Ku iya, semua parti komponen GPS patut bebasaka sempekat ti udah digaga sebedau tu ngambika enda nyadi penyarut bukai.

Ketuai Raban Nembiak SUPP Dudong Benjamin Tian madah, komiti SUPP Dudong udah saum penemu deka nganjung Chairman SUPP Dudong Wong Ching Yong nyadi chalun sida ba penuduk Dudong.

“Pia mega indu parti udah nemu enggau pemutus runding kami tu,” ku iya madah.

Sebedau tu, PDP kala madahka diri bisi ati deka bediri ba DUN Dudong lalu minta Teo Boon Siew nyadi chalun sida ba Pengawa Bepilih Nengeri Ke-12 tu.