KUCHING: Kort Federal di Putrajaya kemari enggau empat ari lima iku akim ngaga pemutus ngarika perintah nengeri enggau orang ke ngempu lisin suwa nulak peminta akim nyerenih baru tanah Hak Adat bumiputera (NCR) Tuai Rumah Sandh enggau Siew Libau.
Keempat iku akim bepenemu ke alai pelasar peminta meresa baru nya lebih ngagai ngapil, ukai ukai diserenih akim baru.
Pekara nya dipadahka siku ari luyar kes nya, Joshua Baru ngagai The Borneo Post ,ti ngenukuka empat akim ngaga pemutus nulak peminta nya. “Sebut pandak kes sida (empat akim) nya, sida ngasaika akim ke nyerenih baru nya lebih ngagai ngapil. Nya kebuah sida nulak peminta nya,” ku Joshua.
Kes nyerenih baru nya mungkur dua kandang endur ti pemesai 18,000 hektar di Kanowit-Ngemah.
Kena 27 Mei 2011, Kort Tinggi di Sibu ngaga pemutusa Sandah enggau komuniti nya bisi tanah NCR ti pemesai lebih 5,639 hektar ke disuwa perintah nengeri ngagai sebuah kompeni. Lalu kes Siew, semilan rumah panjai ngambi eksyen undang-undang ngagai kompeni ti sama.
Kort Apil entap enggau pemutus Kort Tinggi tang pengudah nya Kort Federal nginsil pemutus sida. Akim Tan Sri David Wong Dak Wah, ari Sabah ti kala ke gawa nyadi luyar di Sarawak iya nya semina siku akim ti ngarika peminta tanah NCR nya.
Lebuh ti mantah pemutus empat akim nya, Wong nerima jurai nuntut NCR ti madahka pemutus Kort Federal sebedau tu, bulih dua jaku setuju enggau dua jaku bantah, seraya madahka akim ke dulu ari tu nadai peneleba ba bidang nyadi akim pasal Borneo.
“Iya (Wong) enda setuju enggau peneleba akim pasal Borneo ungkup kes Keruntum.
Kerumtum engkeman enggau peminta kami laban bisi dipadahka dalam ripot Komiti Entara Peruntah (IGC) ti deka ke akim ti ngembuan peneleba nyadi akim pasal Borneo, ukai pematut ti diguna lebuh ngaduka apil ari Sabah tauka Sarawak,” ku Joshua.
Empas Ubah Kanun Tanah 2018 (LCAB) nadai kaul enggau kes tu.
Kort Federal meri pemutus pasal kes Tuai Rumah Sandah Tabau kena 21 Disember 2016. Luyar ti ngarika Tuai Rumah Sandah Tabau enggau Siew Libau udah nya memfailka peminta nyerenih baru pemutus nya.
Peminta nyerenih baru nya dipendingka kena 15 Julai tu tadi ba mua lima panel akim.
Pejurai ti dibantaika iya nya pasal pemutus ti dikenataika Kort Federal dalam apil sivil iya nya pemutus ba empat iku akim maya nya bebagi dua sereta ketegal ngelanggar undang-undang sereta kurang peneleba nyadi akim pasal Borneo.
Isi pekara ti diapil ba taun 2016 nya mega nyebut sekalika ‘pemakai menoa’ enggau ‘pulau galau’ (PMPG) bisi kuasa dalam undang-undang nitihka Artikel 160 Konstitusyen Perintah Besai enggau hak ke ulih ditegika.
Raban panel ti bisi lima iku akim nya udah nya mendingka apil ti digaga lalu empat ari sida nya ngenataika pechara nitihka Seksyen 78 (1) Akta Kort Kehakiman 1964, tang, siku ari sida udah pinchin.
Dua akim ngaga pemutuska iya nya Adat (adat istiadat asli) PMPG nadai kuasa undang-undang nitihka Perkara 160 Konstitusyen Perintah Besai lalu nya alai enda ulih diterit enggau sah, lalu dua ke bukai madahka Adat PMPG ngundan kuasa undang-undang lalu nya alai ulih diteritka dalam kort.
Pemutus Kort Federal dalam hal tutau meri empas ngagai undang-undang ba kandang endur NCR ti benung diuan, dikena sereta diasaika peranak asal Sarawak ari baruh undang-undang selama enggau adat asal.
Kena 27 Mei 2011, Kort Tinggi Sibu netapka Tuai Rumah Sandah enggau peranak bisi hak NCR ngagai semua 5,639 hektar tanah ti disuwa perintah nengeri Sarawak ngagai sebuah kompeni. Dalam kes tanah Siew Libau, kandang endur nya mungkur 11,822 hektar.
Keterubah iya, urung sembilan rumah panjai ngenataika saman ngagai kompeni nya, tang, KortTinggi bepenemu nya semina rumah panjai Siew ti mujur numbuhka hak adat asal.
NCR iya nya bepelasarka pesaka nitih adat Iban PMPG.
Pulau Galau iya nya leka jaku ti diberi ngagai kandang endur tanah ti digalau dikena peranak genturung pendiau tauka rumah panjai bejalaika aktiviti ngasu, nginti enggau ke bukai.
Pemakai Menua iya nya semua kandang endur ke dianggap peranak genturung pendiau tauka rumah panjai nyadi reta sida. Nya nyengkaum kandang endur rumah panjai sereta kandang endur Pulau Galau.
Pemutus Kort Tinggi di Sibu udah nya disukung Kort Apil tang kena 21 Disember 2016, Kort Fedetral nginsil pemutus Kort Apil enggau Kort Tinggi, ti lalu ngenadaika prinsip NCR ngagai Tuai Rumah Sandahm iya nya tuai rumah ngagai 30 pintu enggau Siew.
Kelimpah ari Joshua Baru, luyar bukai ti ngarika orang ke nuntut tanah NCR dalam kes Tuai Rumah Sandah tu iya nya Clarice Chan enggau Dr Yogeswaran Subramaniam.