KUCHING: Kategori ngarang Cherpan Jaku Iban bedau nerima pesereta naka 31 Ogos tu tadi. Berindik ari nya, Gerempung Penulis Sarawak enggau Unit Integriti dan Ombudsman Negeri Sarawak (UNION) meransang mayuh agi rayat nengeri tu masuk Pekit Ngarang Integriti 2019, kelebih agi ungkup kategori pekit ngarang Cherpan Jaku Iban Integriti 2019.
Sekretari Kereja Gerempung Penulis Sarawak, Muhammad Yusuf madahka, naka 31 Ogos tu tadi pengatur pekit nerima timbal ti manah ba penyereta kategori nulis esei Jaku Melayu enggau Jaku Inggeris.
“Tang dalam timpuh ke sama nya (naka 31 Ogos) kami nadai udah nerima sebarang penyereta ungkup kategori Cherpan Jaku Iban.
“Nya alai kami chukup ngelaluka kerejasama ari mensia mayuh nyengkaum gerempung ukai dikuasa perintah (NGO) sereta kelebih agi bala pengajar sekula ngambika meri peransang ngagai nembiak awakka nyereta pekit tu.
“Tambah mega kami bisi nyendiaka perais khas ungkup sekula ti nganjung pesereta ke pemadu mayuh dalam Pekit Ngarang Integriti 2019, kelimpah ari meri setipikit penyereta ngagai tetiap iku pesereta,” ku iya madah ngagai Utusan Borneo.
Entara tuju ngatur Pekit Ngarang Integriti 2019 iya nya dikena meri penemu ngagai raban bansa bekaul enggau isu integriti enggau makai suap, kelabih agi ba raban biak tauka nembiak nengeri tu. Pekit Ngarang Integirti 2019 dibuka ngagai semua peranak Bumi Kenyalang ke bisi status peranak Malaysia.
Peranak Malaysia ti asal ari nengeri bukai tang bisi address di Sarawak mega ulih nyereta, tang pemadu beguna umur enda tau enda tujuh taun ke atas.
Nitih ku iya, pengatur pekit kenyau ari bulan Julai tu tadi udah berengkah ngatur promosyen pekit nya ba tiap bagi menua di nengeri tu baka Sibu, Sri Aman, Betong enggau Miri.
Nambahka nya promosyen tauka penerang pasal Pekit Ngarang Integriti 2019 mega bisi dikerembiaka nengah media sosial baka Facebook, Twitter, Instagram enggau Tumbir.
Kelimpah ari nya poster pekit tu bisi disadung ngagai librari enggau sekula, ku iya.
“Perintah udah meri ungkup belanja besai dikena ngatur program tu nya alai nyadi tanggunpengawa semua anak Sarawak ngerebut peluang dalam pekit tu, ke lalu deka ngiga penau tauka pemandai nulis enggau kreativiti raban bansa ti mayuh bansa di nengeri tu,” ku iya.
Individu ti deka nyereta pekit tu ulih meda sereta ngambi ba https://penulissarawak3.wixsite.com/pertandingan. Kelimpah ari nya tau betanya pasal pekit tu nengah lumur WhatApps ba lumur 011-3717 8788 enggau 012-8885887.
Pekit Ngarang Integriti 2019 keterubah diatur nengah kerejasama enggau Gerempung Penulis Sarawak.
Hari kepenudi nganjung penyereta pekit tu 30 November 2019.