Anda di sini

Palan ngintu pengerami Hari Malaysia 2019 ditukar

 Awang Tengah disempulang Naroden (kiba) enggau Dr Jerip (kanan) ba aum pen garang berita madahka palan endur ngintu Hari Malaysia ditukar ngagai Stadium Tetutup (Stadium Perpaduan), seraya diperatika kaban komiti pengatur ke bukai, kemari. — Gambar Tan Siong Wei
TUKAR ENDUR NGINTU: Awang Tengah disempulang Naroden (kiba) enggau Dr Jerip (kanan) ba aum pen garang berita madahka palan endur ngintu Hari Malaysia ditukar ngagai Stadium Tetutup (Stadium Perpaduan), seraya diperatika kaban komiti pengatur ke bukai, kemari. — Gambar Tan Siong Wei

KUCHING: Pengerai rayat chukup dikemerat, nya alai palan endur ngintu pengerami Hari Malaysia 2019 renggat menua kena 16 September dipindahka ngagai Stadium Tertutup (Stadium Perpaduan) pukul 7 malam.

Sapit Kepala Menteri ti mega nyadi menteri ke mangku tanggungpengawa ngatur pengerami nya, Datuk Amar Awang Tengah Ali Hassan madahka dulu ari tu pengerami nya deka diatur ba Padang Merdeka tang ketegal sebun asap nyadi di mengeri besai Kuching, dipindah ngagai Stadium Tetutup (Stadium Perpaduan), Perta Jaya.

Awang Tengah muji sereta beterima kasih ngagai komiti pengatur enggau pesereta ke ngambi bagi ba pengerami Hari Malaysia 2019 ti udah bebendar belatih sereta sedia ba Padang Merdeka.

“Atur kitai nyikap diri ngintu pengerami Hari Malaysia 2019 ba Padang Merdeka udah manggai urung 80 peratus.

“Nama ti pemadu beguna iya nya kitai enda tau ngasuh mensia mayuh napi risiko pengerai nyema ikas pengamah gaya angin niki ngagai lebih ari 200. Kitai enda nemu nama ke nyadi maya 16 September nya ila.

“Bala komiti udah ngaga pemutus (malam ensanus pengudah baum)alai  ngatur pengerami Hari Malaysia renggat menua deka diatur ba Stadium Tetutup (Stadium Perpaduan) di Petra Jaya kena 16 September ti berengkah pukul 7 malam,” ku iya.

Awang Tengah mansutka pekara  nya dalam aum pengarang berita bekaul enggau Hari Malaysia 2019 ti diatur ba Hornbills Skyway ditu, kemari.  Nitih ku iya, pemutus digaga pengudah mendingka licha tauka penerang ari Opis Pengemata Gaya hari, Kaunsil Pengeraja Asal enggau Rampa Menua (NREB) enggau Opis Rampa Menua (JAS) pasal sebun asap.

Dipelabaka sebun asap deka terus nyadi nyentuk ujung bulan September lalu naka ke diatu bisi lebih ari 100 titik angat ditemu di Kalimantan.

“Kami (komiti) nadai pilih bukai tang mindahka endur ngatur pengerami tu ngagai Stadium Tetutup ketegal beratka isu pengerai.

“Pemadu enda manah angin tauka ribut bepuput agi ngagai Sarawak, lalu enda patut amat enti kitai ngatur pengerami Hari Malaysia ba Padang Merdeka,” ku iya seraya madahka perintah besai udah dipadahka pasal ubah palan alai ngatur pengerami nya.

Awang Tengah dibantu empat iku menteri muda iya nya Datuk Mohd Naroden Majais (Menteri Muda Dagang Antarabansa & Industri, Terminal Industri enggau Pemansang Orang Dagang); Datuk Dr Jerip Susil (Menteri Muda Perengka Pengangkut),  Datuk Roland Sagah (Menteri Muda Pemansang Betanam Betupi, Tanah Adat enggau Kandang Menua) enggau Sharifah Hasidah Sayeed Aman Ghazali (Menteri Muda Undang-Undang, Kaul Nengeri-Perintah Besai enggau Pematau Projek).

Awang Tengah bebendar madahka komiti pengatur deka nentuka pengerami Hari Malaysia ke sekali tu deka nyadi siti agi penyulut. Nitih ku iya, nama program besai ke udah diperambu diatur ba Padang Merdeka mega deka agi terus diatur ba Stadium Tetutup (Stadium Perpaduan).

Entara program ke diatur mungkur pemerindang ari 300 tukang gendang (rabana ubi, Chinese table, dumbak Iban, Beduk Melayu) ngitang Jalu Gemilang, Konvoi Kembara Merdeka enggau ke bukai ti nyemayaka program ti mayuh reti.

“Nambahka nya kereta berias mega agi deka dipejalaika tang semua nya bepanggai ba gaya hari maya nya ila (16 September) ti diperambu berengkah bejalai ari pukul 8 malam ngagai 9.30 malam ari MBKS nuju ngagai Tebing Ai Kuching sereta tembu ba iCom,” ku iya seraya madahka pemerindang atas panggau mega deka terus diatur ba Stadium Tetutup.

Rambai jaku Hari Malaysia taun tu iya nya ‘Sayang Malaysiaku: Malaysia Bersih’ ti diatur begulai entara perintah nengeri enggau perintah besai nengah Opis Menteri Komunikasyen enggau Multimedia Malaysia (KKMM).

Entara temuai ti pemadu dipebasa datai ngulu pengerami Hari Malaysia 2019 iya nya Tuai Megai Menua Tun Pehin Sri Abdul Taib Mahmud enggau bini iya Toh Puan Datuk Patinggi Ragad Kurdi Taib.

Sama deka datai maya tu ila, Menteri Besai Tun Dr Mahathir Mohamad enggau bini iya Tun Dr Siti Hasmah Mohd Ali; Sapit Menteri Besai Datuk Seri Dr Wan Azizah Wan Ismail enggau Datuk Seri Anwar Ibrahim, Kepala Menteri Datuk Patinggi Abang Johari Tun Openg enggau bini iya Datuk Amar Juma’ani Tun Tuanku Bujang, Kepala Menteri Sabah, bala menteri nengeri enggau perintah besai enggau ke bukai.

Program lemai nya deka berengkah enggau penatai Tuai Megai menua sereta mandang video pasal penumbuh Malaysia ti mega sama deka dipandangka maya program nya ditambah enggau program bukai ti lebih ngagai patriotime enggau pemerindang ke bukai.

Menteri Besai enggau Kepala menteri deka bejaku maya tu ila, lalu pengawa bejadika pengerami tu dia temuai ti pemadu dipebasa malu ‘beduk’ seraya dibantu 170 pemain gendang.

Awang Tengah ba aum pengarang berita nya kemari disempulang Naroden enggau Dr Jerip sereta kaban komiti pengatur ke bukai.