BINTULU: Sarawak ngemujurka juluk deka terus nyungkak ekonomi nengah pengawa numbuhka loji methanol ti keterubah di nengeri tu.
Chairman Sarawak Petchem Sdn Bhd Tan Sri Datuk Amar Abdul Aziz Datuk Husain madah, kemari ngelaika siti agi pemujur Sarawak ba pengawa mujur malutka diri dalam industri memproses petrokimia, minyak enggau gis di Bintulu.
“Nadai kebuah enda ulih projek tu dipejalaika enggau kaul Petronas nengah Sempekat Nyual Gis (GSA) ke alai kunchi penetap udah disetuju pengudah Sempekat Meli enggau Nyual (SPA) ke alai produk nya deka diambi Petronas Chemicals Marketing Labuan Ltd.
“Nengah sukung operasyen enggau pengawa ngintu manah (O&M) nengah memorandum pemereti (MoU) ke disain begulai enggau Institut Teknologi Petroleum Petronas (INSTEP) dikena ngelatih pengulih ngemansangka juruteknik enggauoperator baru,” ku iya ba jaku pengelalu maya pengerami Nasih Tanah Projek Loji Methanol di Similajau Tanjung Kidurong ditu, kemari.
Samsung Engineering Company Limited (SECL), kompeni EPC betikas dunya enggau bakih Sarawak Petchem meri jamin loji nya deka diserah dalam timpuh 36 bulan lebuh ke disadang tembu ba pengujung suku keempat 2022.
Air Liquide Global Engineering enggau Construction ialah nyadi penyendia teknologi.
Projek methanol naka ke diatu ba renggat fasa kedua lalu Pansik Penau Ke Silik deka tembu digaga dalam timpuh tujuh bulan.
Projek injiniring enggau begaga nya dijangka berengkah suku kedua 2020 pengudah nemu pemutus kepenudi (FID).
Sarawak Petchem Sdn Bhd ditumbuhka ba taun 7 Jun 2017 enggau juluk deka bejalaika pengawa ngemansang enggau operasyen loji methanol keterubah Sarawak sereta mega kompeni keterubah Sarawak ngeluarka methanol enggau kapasiti 1.7 juta tan metrik setaun(mtpa).
Loji nya ti didirika ba Kilometer 3 Jalan Similajau dijangka beroperasyen enggau komersial ba suku keterubah 2023 sereta nyadi ti keterubah ba indutri memproses minyak enggau gis di Sarawak.
Projek methanol Sarawak beguna amat dikena ngubah ekonomi Sarawak sereta ng erembaika rentayan industri tambah rega memproses minyak enggau gis sereta ngubah nengeri tu nyadi hab petrokimia di pelilih tu.
Loji itu didiri ba tanah pemesai 75 ekar (30 hektar) sereta begunaka 160 juta metrik kubik kaki peregi sehari (mmscfd) kereban mata gis asal ti ulih ngemansutka 5,000 tan metrik sehari (MTPD) methanol ngena teknologi Ai Liquide.
Loji Methanol deka nguna 19,000 meter kubik (m3) sehari ai lalu dianggarka 17 megawatt (MW) elekterik dikena bejalaika operasyen loji.