KAPIT: Jefferson Jamit Unyat udah ngabas Projek Lanskap Waterfront Kapit ke baru udah tembu digaga sereta nentuka api ke dilekat nya manah magang.
Projek nya digaga berengkah ari Terminal Kapit nyentuk ke Fort Sylvia ba Jalai Kubu ditu.
Injinir Bagi Menua Kapit, Anding Unchi disempulang kunteraktor Leonard Jembu enggau arkitek konsultan ari Arkitek Gayasari, Michael Tan nerang ngagai Jamit sentang penembu Projek Waterfront Kapit nya.
Pengudah ke meresa projek nya, Jamit madahka diri gaga ati laban nya deka nyadi palan pematak baru ngagai rayat dia, sereta nyadi palan baru endur mensia mayuh dia bejalai ngelantangka ati.
“Tadi, Injinir Bagi Menua Kapit, Anding Unchi nerang silik ngagai aku sentang projek waterfront tu. Meri pengagai ati ngagai kunteriktor ti udah nembuka kereja sida dulu ari timpuh ke ditetap (ke patut tembu digaga ujung taun tu ). Aku gaga amat ati laban projek tu udah tembu. Kereja ti digaga sida pan manah.Tu deka nyadi palan pematak baru”, ku Jamit
“Tu mega nyadi siti ari ikon lumba ai di Kapit iya nya Regatta safari berakit, lumba bot laju enggau ke bukai. Nya diatur ninting taun serata matak penatai mensia mayuh. Enti lumba ai nya diatur, tebing ai ai tu deka dedat laban mensia mayuh ke datai meda. Diatu, nengah penembu projek tu, mensia mayuh lantang datai meda lumba nya ba palan ke meruan”, ku Jamit
Bedil besai bisi ba waterfront nya laban Pasar Kapit Town nyadi kuta Rajah Brooke di Ulu Rajang. Pemisi bedil besai nya mega nyadi kelai sida ngetanka diri ari bala Iban ti ngayau ngulihka pala. Nya alai, bedil tu nyadi simbol Pasar Kapit.
Berebak enggau nya,iya mega pemeresi ba minta palan dijaga manah. Ku iya, tong uras patut diengkah ba endur ke patut ngambika ngemudahka mensia mayuh muai uras.
Iya bisi mantaika sekeda berita manah ke alai perin tah udah ngungkupka sekeda belanja dikena ngemanahka anak sungai ke enda jauh ari projek waterfront nya. Pengawa nya deka dipejalaika udah tu ila.
“Projek bukai ti benung digaga diatu baka ngaga baru Pegung Lily, ngaga baru Town Square enggau ngemanahka lanskap tebinga ai penyangkai kapal Kapit/Belaga/Baleh, lalu enti udah tembu digaga pun taun baru, nya deka ngubah gamal Kapit”, ku iya.
Aku meri besai terima kasih ngagai Kepala Menteri Abang Johari laban udah ngemendarka projek tu asil ari pengawa dikereja Tim GPS Kapit ti betuaika Sapit Kepala Menteri Tan Sri Datuk Amar Dr James Jemut Masing enggau Penyanding Penemu ba Opis Kepala Menteri Datuk Alexander Nanta Linggi enggau semua pengari rayat di Kapit.
Kami semua chakah gawa, bekerejasama ngambika projek di Kapit dikemendar ke pemaik semua. Tu ungkup rayat di Kapit lalu aku arapka sida gaga ati nerima pemanah pengaw ke dikereja Perintah GPS , ku Jamit
Sama bisi maya nya Sekretari Politik Kepala Menteri Sarawak Tapah Ata, Sapit Residen Kapit Galong Luang, Tuai Kunsil Opis Pelilih Kapit Lating Minggang, Superintenden Tanah enggau Survei Kapit Sagu Unting, pemesai pengereja penga ba Opis Pelilih Kapit BidahLujah, akauntan Opis Pelilih Kapit Amanda Dominic, Pemancha Yong Thu Fook, Penghulu Sia Shui Poh, KapitanTeoTian Chai, Kapitan Yap Hui Li enggau bala bukai.