Anda di sini

430 pesereta Jamboree 4x4 Antarabansa Ke-4 Sarawak 2019 bekejang ari Bintulu pagi tu

 Lebih 100 kerita 4WD mansang ke pasar Bintulu nyereta pengawa ngelepaska pereseta.
GAGIT: Lebih 100 kerita 4WD mansang ke pasar Bintulu nyereta pengawa ngelepaska pereseta.

BINTULU: Urung 430 iku pesereta ari 12 buah menua ngena180 buah kerita 4WD deka beleka ari Padang Bilun Lama di Bintulu seharitu (12 Sept) enggau ba Jamboree 4x4 Antarabansa Ke 4  Sarawak 2019.

Bala  pesereta nya dipelaba dilepaska Menteri Dagang Temuai, Seni, Main Asal Nembiak Lumba enggau Main Sarawak, Datuk Abdul Karim Rahman Hamzah, pukul 7 pagi.

Bala pesereta deka nujah menua ba pelilih Tatau, Sebauh, Tubau, Belaga lalu bemalam ba Long Bangan, rumah panjai bansa  Kenyah sereta mulaika diri ke Bintulu kena 15 September.

4x4 Travel & Adventure Club Sarawak tauka dikelala agi enggau nama SAKTA, ke ngatur program tu ditumbuhka dalam taun 2005 sereta rasmi direjista ba Opis Pengerejista Gerempung ba taun 2007.

SAKTA udah mandangka diri majak ulih ngatur Jamboree 4x4 Antarabansa Ke 4  Sarawak nyentuk ke dikelala ba renggat antarabansa nyadi program ‘Gateway to Adventure Nature’ 4-Wheel-Drive di Sarawak.

Program tu dikemendar sereta disukung Opis Menteri Dagang Temuai, Seni, Main Asal Nembiak Lumba enggau Main Sarawak.

Jamboree 4X4 Sarawak keterubah diatur ba taun 2016 ti disereta 55 buah kerita.

Ba taun nangkanka nya disereta 70 kerita lalu Jamboree ketiga disereta 180 kerita enggau 480 iku pesereta, berengkah ari umur 18 nyentuk 72 taun ari enam buah  menua, ke ngasuh nya nyadi  jamboree ke pemadu dikingat naka ke diatu.

Diaku nyadi program antarabansa 4X4 ke beprestij di Sarawak Borneo,udah muka peluang ngagai orang ti rinduka main nya di serata Sarawak.

Tu nyengkaum Sabah, Semenanjung Malaysia, Brunei, Indonesia, Switzerland, Hong Kong, China, United Kingdom, United State, Filipina, Peranchis, Kanada enggau ke bukai ti bekunsika pengaggit enggau pengerindu nengah jalai ti mar ditengah   seraya ngasaika penyamai ba rampa menua ti nadai pengerichah, meruan manah, adat main asal enggau palan ke besejarah di  Sarawak, ari siti bagi menua ngagai bagi menua ke bukai.  

Mar agi, pedis agi sereta jauh agi dilawa, nya deka nyadika pengerindu ngagai bala pesereta.