SIBU: Urung 200 iku raban Kristian Katolik ari pelilih Sibu udah ngambi bagi dalam Seminar Pengidup Dalam Roh Kudus ke diatur Iban Pastoral Apostolate (IPA) ari Gerija Besai Sacred Heart ba Dewan Sacred Heart Sekula Primari St Rita ditu, ensana.
Bisi lapan bengkah ajar dikenatai ba seminar dua ari nya ti nyengkaum Puji Sembah, Jesus Pengelepas, Pengerindu Allah Taala, Pengampun Ngenataika Kuasa Penyuman, Nyuman Pengingat & Sembiang, Pemeri Enggau Roh Kudus enggau Sembiang Penurun Roh Kudus.
Moderator seminar Michael Ili madahka seminar nya diatur ke sida ti deka nyambut Sakramen Pengentap taun tu.
“Puji Tuhan, ukai semina lebih 140 iku orang ke deka nyambut sakramen nya, kami bisi nerima orang bukai ke deka ngeringka pengarap enggau penemu sida dalam seminar tu,” ku iya.
Michael madah, gerija ngarapka mayuh agi raban Katolik di menua tu deka enggau seminar ti sebaka jemah ila.