KUCHING: Tiga projek jematan di nengeri tu ti beungkus sepenyampau RM1.1 bilion ke dibatak pulai perintah besai, deka digaga perintah Sarawak.
Sapit Kepala Menteri, Tan Sri Datuk Amar James Jemut Masing madah, tiga jematan ti patut dipelanja perintah besai tang dibatak pulai iya nya jematan Rambungan beungkus RM300 milion, jematan Batang Igan RM300 milion enggau jematan Batang Lupar RM1 bilion.
Ku iya, jematan Batang Lupar ti beungkus RM1 bilion nya nitihka semaya perintah besai deka ngungkupka belanja 50 peratus ari penyampau nya, iya nya melanja RM500 milion.
“Kitai bisi jematan Rambungan, Batang Igan enggau jematan Batang Lupar, semua tu disemaya deka dipelanja perintah besai tang dibatak pulai kelimpah ari 50 peratus (RM500 milion) jematan Batang Lupar.
“Penyampau semua belanja projek nya ke ditarit pulai perintah besai iya nya RM500 milion (jematan Batang Lupar), RM300 million (jematan rambungan) enggau RM300 milion (Jematan Batang Igan), lalu penyampau semua nya urung RM1.1 bilion,” ku iya.
Masing ti mega Menteri Pemansang Palan Penyangkai Kapal enggau Infrastruktur mansutka pekara nya lebuh ditanya ba aum pemberita nyerumba pengawa nyain kunterik entara Lembaga Pembangunan Koridor Wilayah (RECODA) enggau enam kunteriktor ti deka ngemansangka projek infrastruktur ari baruh Ejensi Pemansang Hulu Rajang (URDA) ba Penview Convention Centre (PCC) ditu, kemari.
Masing madahka perintah nengeri nengah opis menteri iya deka bejalaika projek nya dikena nentuka nengeri tu bisi penyambung kelebih agi pengawa deka ngemansangka jalai besai tebing pantai mujur dipejalaika.
“Enti kitai enda ngaga jematan tu kitai deka betapi enggau penanggul ba jalai besai tebing pantai, nadai penyambung.
“Perintah nengeri enda ngemendarka pekara nya nyadi, kitai enggai ngetu tauka ngachau pengawa ngaga jalai besai tebing pantai. Nya kebuah perintah melanja ungkus belanja nya.
“Semua tu (tiga jematan) ari baruh Opis Menteri. Ke ukai ari baruh opis menteri ke dijaga aku, aku enda nemu,” ku iya seraya madahka Gabungan Parti Sarawak (GPS) besemaya, GPS ngamatka semaya.
Taja pia, ketegal perintah besai matak pulai agih belanja ke diungkup nya lalu perintah nengeri nyanggup ngambi nya, dia perintah nengeri nadai peluang ngungkupka belanja ngagai endur bukai, ku iya.
Sama bisi ba aum pengarang berita nya kemari, Menteri Muda Elekterik Menua Pesisir ti mega ADUN Belaga Datuk Liwan Lagang,Kaban Parlimen Kapit Datuk Alexander Nanta Linggi; Kaban Parlimen Hulu Rajang Datuk Wilson Ugak Kumbong; Kaban Parlimen Kanowit Datuk Aaron Ago Dagang; Kaban Kunsil Nengeri (ADUN) Ngemah Alexander Vincent; ADUN Machan Allan Siden Gramong enggau ADUN Murum Chukpai Ugun sereta Ketuai Pemesai Eksekutif RECODA Datu Ismawi Ismuni.