Anda di sini

Palan pengerami ngintu Hari Malaysia dipindah ngagai Stadium Perpaduan

Awang Tengah ba aum pemberita madahka Hari Malaysia 2019 peringkat nasional kena 16 September diatur ba Stadium Perpaduan, Petra Jaya. Nyempulang iya ba aum pemberita nya Naroden enggau Dr Jerip sereta kaban komiti pengatur ke bukai, sehari tu. - Gambar Tan Siong Wei
Awang Tengah ba aum pemberita madahka Hari Malaysia 2019 diatur ba Stadium Perpaduan, Petra Jaya. Nyempulang iya ba aum pemberita nya Naroden enggau Dr Jerip sereta kaban komiti pengatur ke bukai, sehari tu. - Gambar Tan Siong Wei

Dikarang Rengenyan Labang 

KUCHING: Hari Malaysia 2019 peringkat nasional kena 16 September ti diperambu diatur ba Padang Merdeka deka dipindahka ngagai Stadium Perpaduan.

Sapit Kepala Menteri Datuk Amar Awang Tengah Ali Hasan madah nya berindik ari mengeri besai Kuching betapi enggau penanggul sebun asap.

"Bala komiti udah ngaga pemutus iya nya palan endur ngatur pengerami Hari Malaysia peringkat nasional deka diatur ba Stadium Tertutup (Stadium Perpaduan) di Petra Jaya kena 16 September ti berengkah pukul 7 malam.

"Pengudah mendingka licha ari Opis Pengemata Gaya hari, Lembaga Sumber Asli dan Alam Sekitar (NREB) enggau Opis Rampa Menua (JAS) pasal sebun asap, kami nadai pilih bukai tang mindahka endur ngatur pengerami tu ngagai Stadium Tertutup ketegal isu pengerai.

"Dipelabaka sebun asap deka terus nyadi nyentuk ujung bulan September lalu naka ke diatu bisi lebih ari 100 tompok angat ditemu di Kalimantan," ku iya dalam aum pemberita Hari Malaysia ti diatur ba Hornbills Skyway ditu, sehari tu.

Awang Tengah ti nyadi menteri betanggungjawab ngagai pengerami nya dibantu empat iku menteri muda iya nya Menteri Muda Dagang Antarabansa & Industri, Terminal Industri enggau Pemansang Orang Dagang Datuk Mohd Naroden Majais; Menteri Muda Perengka Pengangkut Datuk Dr Jerip Susil; Menteri Muda Pemansang Betanam Betupi, Tanah Adat enggau Kandang Menua Datuk Roland Sagah enggau Menteri Muda ba Opis Kepala Menteri (Undang-Undang, Kaul Nengeri-Perintah Besai enggau Pematau Projek) Sharifah Hasidah Sayeed Aman Ghazali.

"Pemadu enda manah angin tauka ribut bepuput agi nuju ngagai Sarawak ti lalu enda senipak amat enti kitai ngatur pengerami Hari Malaysia ba Padang Merdeka.

"Nama ti pemadu beguna kitai enda tau meri risiko ngagai pengerai mensia mayuh nyema ikas pengamah gaya angin niki lebih ari 200. Kitai enda nemu nama ke nyadi maya 16 September nya ila," ku Awang Tengah ti disempulang Naroden enggau Dr Jerip sereta kaban komiti pengatur ke bukai ba aum pemberita nya.

Berebak enggau tu Awang Tengah bebendar madahka komiti pengatur deka nentuka pengerami Hari Malaysia ke sekali tu deka nyadi siti agi penyulut.

Nitihku iya nama acara besai ke udah diperambu diatur ba Padang Merdeka mega deka agi terus diatur ba Stadium Tertutup (Stadium Perpaduan).

Entara acara ke diatur mungkur pemerindang ari 300 tukang gendang (rabana ubi, Chinese table, dumbak Iban, beduk Melayu) ngitang Jalu Gemilang, Konvoi Kembara Merdeka enggau ke bukai ti nyemayaka acara ti mayuh reti.

"Nambahka nya kereta beias mega agi deka dipejalaika tang semua nya bepanggai ngagai gaya hari maya nya ila (16 September) ti diperambu berengkah bejalai ari pukul 8 malam ngagai 9.30 malam ari MBKS nuju ngagai Tebiang Ai Kuching sereta tembu ba iCom," ku iya seraya mada pemerindang atas panggau mega deka terus diatur ba Stadium Tertutup.

Tema Hari Malaysia taun tu iya nya 'Sayang Malaysiaku:Malaysia Bersih' ti diatur begulai entara perintah nengeri enggau perintah besai nengah Opis Menteri Komunikasyen enggau Multimedia Malaysia (KKMM).

Bisi datai ngagai pengerami Hari Malaysia Nya nyengkaum Tuai Pemegai Menua Tun Pehin Sri Abdul Taib Mahmud enggau Toh Puan Datuk Patinggi Ragad Kurdi Taib, Menteri Besai Malaysia Tun Dr Mahathir Mohamad, Kepala Menteri Sarawak enggau Sabah sereta temuai dipebasa ke bukai.