Anda di sini

NADMA nganjung 500,000 iti sengkabung mua ke Sarawak

PUTRAJAYA: Agensi Mutar Penusah Ngenyit Menua (NADMA) udah ngulih sereta nganjung 500,000 iti sengkabung mua ngagai Komiti Mutar Penusah Ngenyit Nengeri (JPBN) Sarawak berindik ari penusah sebun asap meraka garis entara menua ke ditapi di nengeri tu diatu.

NADMA ba sebengkah penerang kemari madahka sida benung matau silik gaya sebun asap di Sarawak enggau sekeda nengeri bukai ke bepun ari penusah angus di Kalimantan enggau Sumatera, Indonesia.

“Notis bejejaga udah dikeluarka Palan Ngeluarka Perintah Penusah Ngenyit Menua (NDCC) ngagai semua JPBN ngambika nyendiaka diri,” ku NADMA.

Nitihka ripot ari Meteorologi Malaysia (MET) naka pukul 8 pagi kemari, bacha Indeks Pengamah Angin (IPU) di Sarawak kelebih agi di Sri Aman (201) ba ikas ke Pemadu Kamah. Ba sekeda kandang menua bukai di Sarawak nyengkaum Kuching (160) lalu Samarahan (127) ba ikas ke Kamah.

Bacha IPU ba sekeda kandang menua di Semenanjung iya nya Kamah ba Johan Setia Klang (159), Petaling Jaya (131), Shah Alam (123) di Selangor; Cheras (135), Putrajaya (130) di Wilayah Persekutuan; Seremban (112), Nilai (134) di Negeri Sembilan; Tangkak (109) di Johor; enggau Rompin (197) di Pahang.

Bacha IPU 0-50 Beresi; 51-100 Jelan Pemeresi; 101-200 Kamah; 201-300 Kelalu Kamah; 300 ke atas Tau Ngeruga Pengerai.

NADMA madahka ejensi nya enggau Opis Menteri Pelajar benung ngatur ngulihka sengkabung mua ke dianjung ngagai sekeda sekula di nengeri ke bisi napi penanggul sebun asap.

“Pemutus nutup sekula deka digaga Opis Menteri Pelajar bepelasarka bacha IPU ke pemadu baru lalu sekula dipinta tutup enti IPU ngelui 200,” ku iya.

Ku NADMA, ejensi nya enggau Sokdadu Langit Diraja Malaysia (TUDM) udah nyendiaka diri mantu MET ngemujurka operasyen ngaga benih remang (OPA) enti gaya atmosfera manah.

Rayat kelebih agi di negeri enggau kandang menua ke ngembuan bacha IPU dba ikas Pemadu Kamah enggau Kamah dilalau ngurangka aktiviti fizikal enggau luar, seruran ngena sengkabung mua (mask) nyema bisi kebuah ba endur lapang, mayuh ngirup ai sereta anang nunu.

Berebak enggau nya ku NADMA, Malaysia udah bejaku enggau Indonesia sentang isu sebun asap nya.

Kelimpah ari surat minta kerejasama mutarka penanggul sebun asap ari Menteri Kuasa, Sains, Teknologi, Rampa Menua enggau Ubah Gaya Hari, Yeo Bee Yin ngagai opis menteri ke bekaul di Indonesia, Duta Besar Malaysia ke Indonesia, Zainal Abidin Bakar mega udah betemu enggau Opis Menteri Luar Indonesia kemari (9 September).

Entara pekara ke dikerandau iya nya empas negatif ngagai rayat Malaysia ketegal sebun asap, enggau juluk ngambika Indonesia terus beratka pengawa ngerara sereta matau enggau nyeliah, ngambika pengawa betutu enggau sebun asap meraka garis entara menua enda nyadi agi kelebih agi maya musim kemarau ke deka n yadi dalam kandang beberapa bulan ke deka datai.

Bela dikerandauka iya nya penyendia Malaysia deka bekerejasama sereta nyuaka sukung enggau bantu teknikal nyema diguna ngambika begulai mutarka penanggul sebun asap meraka garis entara menua ke kalai di pejalaika ba taun 1998 di Kalimantan enggau taun 2005 di Riau.

Taja pia ku NADMA, naka ke diatu nadai peminta bantu ngerara penusah angus ke nyadi di Kalimantan enggau Sumatera diterima ari perintah Indonesia. — Bernama