KUCHING: Enam projek keterubah ari semua 34 bengkah projek pemansang infrastruktur ti dipejalaika Lembaga Pembangunan Koridor Wilayah (RECODA) ari baruh Ejensi Pemansang Hulu Rajang (URDA) deka berengkah dipejalaika taun baru.
Sapit Kepala Menteri ti mega Menteri Pemansang Palan Penyangkai Kapal enggau Infrastruktur, Tan Sri Datuk Amar James Jemut Masing, madahka nya berindik ari RECODA ti udah nyain kunterik enggau enam kunteriktor ti deka ngemansangka projek nya.
Masing ti nyadi Chairman URDA madahka perintah nengeri ngungkupka belanja urung RM1.5 bilion dikena ngemansangka semua 34 projek infrastruktur ba kandang endur ke dibungkur URDA, ti dipejalaika dalam timpuh dua taun (2019-2020).
“Kami diungkupka perintah nengeri RM1.5 bilion dikena bejalaika semua 34 projek ari baruh URDA. Lalu URDA tu mungkur pelilih menua Belaga, Bukit Mabong, Kapit, Song enggau Kanowit.
“Tadi (kemari) kitai ngemataka enam projek keterubah (ari 34 projek) deka dipejalaika sereta diberi ngagai beberapa kunteriktor ngambika ngaga projek nya, baka ke disain (RECODA enggau enam kunteriktor).
“Nengah projek ti baka tu kitai deka ulih ngemanahka agi penyambung ba kandang endur ti dibungkur URDA sereta udah tentu deka mayuh projek bukai datai,” ku iya.
Masing ti mega Kaban Kunsil Nengeri (ADUN) Baleh dalam aum pengarang berita pengudah ngemataka pengawa kunterik ti diatur RECODA ba Penview Convention Centre (PCC) ditu, kemari.
Penembu enam projek tu digaga deka nyendia, nguntung sereta nyambung jalai ngagai 24 buah rumah panjai.
Lebuh ditanya sekalika kandang endur ke dibungkur URDA dikemansangka enggau pengawa betanam betupi, Masing madah, enda ngira nama ti deka dikemansangka tang pemadu beguna jalai ti nyadi penyambung pemadu dikemeratka dulu.
“Enda ngira nama ti dikereja kitai, tanah patut dikemansangka enda ngira sekalika nengah pengawa betanam betupi tauka utai bukai tang penyambung iya nya keterubah iya nya pelasar perengkaguna mesti digaga dulu, udah nya baru pengawa betanam betupi tauka aktiviti sosio ekonomi bukai ulih dikemansangka.
“Nama ke pemadu beguna iya nya penyambung enda tau enda dulu, ke bukai datai dudi, nya bepanggai ba rayat endur nya,” ku iya.
Dalam aum pengarang berita ke sama KetuaI Pemesai Eksekutif RECODA Datu Ismawi Ismuni madahka projek nya dipejalaika dua taun.
“Tang taun tu semua projek nya patut ditinda laban taun baru kitai patut ba peringkat bejalaika projek tu,” ku iya.
Kunterik ngaga projek nya disain entara RECODA ti diarika Ismawi enggau Hock Seng Lee Berhad diarika Managing Direktor Dato Paul Yu Chee Hoe (ngaga jematan Ng Machan, Jalai Ulu Machan); Hanayin Engineering Sdn Bhd diarika Managing Direktor Engsah Han (ngaga jalai baru ngagai Ng Geremai, Kanowit); enggau WHE Contract Sdn Bhd diarika Direktor Azahari Morshidi (ngemanahka jalai kompeni kayu batang ke endang udah bisi ngagai Skim Tunoh, Melinau Kapit (Fasa 1)).
Nambahka nya, RECODA ti diarika Ismawi nyain kunterik enggau Davila Construction Sdn Bhd diarika Managing Direktor Alan Michael Manyin (nyambungka jalai baru ngagai Skim Tunoh (Fasa 1)); Kemudi Harta Sdn Bhd diarika Managing Direktor Khairudin Ibrahim (ngaga jalai penyambung ngagai Uma Sambop) enggau Bumi Utara Construction Sdn Bhd diarika Director Saing Lanchang (ngemanahka jalai kampung ke udah bisi ngagai SK Long Urun).
Bisi datai ba pengawa nyain kunterik nya, Menteri Muda Elekterik Menua Pesisir ti mega ADUN Belaga Datuk Liwan Lagang, Kaban Parlimen Kapit Datuk Alexander Nanta Linggi; Kaban Parlimen Hulu Rajang Datuk Wilson Ugak Kumbong; Kaban Parlimen Kanowit Datuk Aaron Ago Dagang; Kaban Kunsil Nengeri (ADUN) Ngemah Alexander Vincent; ADUN Machan Allan Siden Gramong enggau ADUN Murum Chukpai Ugun.