Anda di sini

RECODA nyain kunterik ngemansangka enam projek infrastruktur keterubah ari baruh URDA

Masing (duduk dua kiba) enggau Ismawi (duduk, kiba) sereta bala kaban parlimen enggau ADUN begambar bebala mayuh enggau kunterikter pengudah tembu nyain konterik bejalaika projek pemansang infrastruktur ba kandang endur URDA, sehari tu. - Gambar Chimon Upon

Dikarang Rengenyan Labang 

KUCHING: Lembaga Pembangunan Koridor Wilayah (RECODA) nyain kunterik enggau enam kunteriktor ti deka bejalaika projek infrastruktur ba kandang endur ke dibungkur Agensi Pembangunan Hulu Rajang (URDA).

Pengawa nyain kunterik nya diatur ba Penview Convenction Centre (PCC) ti dikemataka Sapit Kepala Menteri ti mega Menteri Pemansang Palan Penyangkai Kapal enggau Infrastruktur, Tan Sri Datuk Amar Dr James Jemut Masing.

Nitihku Masing ari baruh URDA perintah nengeri deka bejalaika 34 bengkah projek pemansang infrastruktur ti begunaka belanja urung RM1.5 bilion sereta dipejalaika dalam timpuh dua taun (2019 -2020).

Masing ti mega Chairman URDA madahka projek pemansang ari baruh URDA deka mungkur pelilih menua Belaga, Bukit Mabong, Kapit, Song enggau Kanowit.

"Kami diungkupka perintah nengeri RM1.5 bilion dikena bejalaika semua 34 projek ari baruh URDA.

"Tadi (sehari tu) kitai ngemataka enam projek keterubah (ari 34 projek) deka dipejalaika sereta diberi ngagai beberapa kunteriktor ngambika bejalaika projek nya, baka ke disain (RECODA enggau enam kunteriktor).

"Nengah projek ti baka tu kitai deka ulih ngemanahka agi penyambung ba kandang endur ti dibungkur URDA sereta udah tentu deka mayuh projek bukai datai," ku iya dalam aum pemberita pengudah ngemataka pengawa nyain konterik nya sehari tu.

Penembu enam projek tu digaga deka nyedia, nguntung sereta nyambung jalai ngagai 24 buah rumah panjai.

Dalam aum pemberita ke sama KetuaI Pemesai Eksekutif RECODA Datu Ismawi Ismuni madahka projek nya dipejalaika dua taun.

"Tang taun tu semua projek nya patut ditinda laban taun baru kitai patut ba peringkat bejalaika projek tu," ku iya.

Kunterik bejalaika projek nya disain entara RECODA ti diarika Ismawi enggau Hock Seng Lee Berhad (ngaga jematan Ng Machan, Jalai Ulu Machan); Hanayin Engineering Sdn Bhd (ngaga jalai baru ngagai Ng Geremai, Kanowit); WHE Contract Sdn Bhd (ngemanahka jalai kompeni kayu batang ke endang udah bisi ngagai Skim Tunoh, Melinau Kapit (Fasa 1)); Davila Construction Sdn Bhd (nyambungka jalai baru ngagai Skim Tunoh (Fasa 1)); Kemudi Harta Sdn Bhd (ngaga jalai penyambung ngagai Uma Sambop) enggau Bumi Utara Construction Sdn Bhd (ngemanahka jalai kampung ke udah bisi ngagai SK Long Urun).

Bisi datai ba pengerami nyain kunterik nya, Menteri Muda Elektrik Menua Pesisir ti mega ADUN Belaga Datuk Liwan Lagang, Kaban Parlimen Kapit Datuk Alexander Nanta Linggi; Kaban Parlimen Hulu Rajang Datuk Wilson Ugak Kumbong; Kaban Parlimen Kanowit Datuk Aaron Ago Dagang; Kaban Kunsil Nengeri (ADUN) Ngemah Alexander Vincent; Kaban Kunsil Nengeri (ADUN) Machan Allan Siden Gramong enggau ADUN Murum Chukpai Ugun.