Anda di sini

Perintah Sarawak seruran nyukung program tikas antarabansa

 Sekeda fesyen ke ditengkebang pesereta BOAD19 ti dipandangka model ba Malam Gala BOAD19 di Kuching, malam Hari Enam.
MANAH: Sekeda fesyen ke ditengkebang pesereta BOAD19 ti dipandangka model ba Malam Gala BOAD19 di Kuching, malam Hari Enam.

KUCHING: Perintah Sarawak nengah Opis Menteri Dagang Temuai, Seni enggau Main Asal seruran ngelaluka enggau nyukung pengawa ke ngatur program antarabansa di nengeri tu.

Menteri Dagang Temuai, Seni enggau Main Asal Datuk Abdul Karim Rahman Hamzah madah, enggau ngatur program ke besai baka ‘Best of ASEAN Designers 2019’ (BOAD19), nya ngemudahka pengawa perintah dikena ngangkatka Sarawak dalam kar dagang temuai dunya.

Nitih ku iya, nya amai ngaga ke ati ketegal Sarawak ke udah dipilih nyadi palan alai ngatur program nengkebang ASEAN ungkup taun tu.

“Nya alai kitai temegah ati nyukung program ti beprestij tu laban ulih meri peransang sereta ngerichahka agi pengeransing kitai dalam ngelakuka Kimpin Taun Nemuai ke Sarawak ti dilanchar bulan Disember taun siti nyin kemari.

“Enggau bala pesereta penengkebang fesyen ke datai ari China, Indonesia, Singapura enggau menua ke bukai ari rantau ASEAN, aku bisi pengandal ati diri pengawa ke ngatur BOAD19 ditu (Kuching) engkeman bendar enggau agenda ngelakuka dagang temuai nengeri,” ku iya bejaku ba pengerami Malam Gala BOAD19 di Palan Aum  Borneo Kuching ditu, malam Hari Enam.

Program nya ke diatur Creative TeamLab Sdn. Bhd enggau ASEAN Fashion Designer Showcase (AFDS) sereta disukung Opis Menteri Dagang Temuai, Seni enggau Main Asal nya digulu Kepala Menteri, Datuk Patinggi Abang Johari Tun Openg sereta bini, Datin Patinggi Datuk Amar Juma’ani Tun Tuanku Bujang.

Abdul Karim nambah program nya dipeda ulih nyendiaka pelasar dikena Sarawak mandangka penyelai seni enggau main asal ti dikembuan ngagai menua ASEAN lalu pia mega sekeda menua luar bukai di dunya.

“Tu siti ari pengawa kitai dikena ngelakuka Sarawak ba dunya. Nya alai, aku pechaya program tu ukai aja ulih ngerapitka kaul entara menua di Asia Tenggara dalam bidang nengkebang fesyen tang ulih ngelakuka Sarawak ngagai menua kuar,” ku iya.

Nitih ku iya, Sarawak jam ke diatu benung chakah besemekih dalam industri dagang temuai ti pemadu kompetitif.

“Tang kitai berasai gaga ati laban Sarawak ngembuan mayuh macham bengkah pengeraja asal, adat asal enggau perengka guna dagang temuai ti manah ti ulih meri mayuh pemanah ngagai orang ke bisi datai ari dalam enggau luar menua.  

“Nya kebuah opis menteri kitai bejalaika pengawa enggau agresif ngatur program dagang temuai ti manah laban kelimpah ke ngembuan pengelebih tu, kitai mega ngembuan sukung ti entap ari perintah nengeri dalam nyapai misyen enggau tuju kitai,” ku iya nambah.

Berebak enggau nya, iya madahka Perintah Nemgeri terus komited dikena matak orang beranak ke puku dalam infrastruktur dagang temuai sereta ngangkatka akses langit Sarawak ungkup temuai antarabansa.

Tu, ku iya, deka ngangkatka kualiti servis dagang temuai Sarawak ngambika sebanding, enti enda manah agi ari palan ke bukai di rantau tu.

Sama bisi diayanka ba program nya, mandangka fesyen ari pesereta BOAD19 ke mungkur 21 iku penengkebang fesyen ke tebilang ari Asia Tengggara sereta nyuaka chek ngagai tiga gerempung pengasih di Sarawak seraya dikemataka Abang Johari.

Entara nya, Creative TeamLab Sdn Bhd meri bantu RM20,000 ngagai Palan Pematih Dalam Komuniti (PDK) Sri Satok enggau RM10,000 ngagai Opis Kampung Sarawak (SFC) ba penaluk nyaga kampung, lalu Dr Teoh Eng Keat ari Pulau Pinang mega meri bantu RM5,000 ngagai SFC dikena penaluk nyaga penyu.