Anda di sini

Pekebun ti nerima paung ukai rian ‘Musang King’ ulih ngeripot ke Opis Betanam Betupi

 Lee nyaup Uggah muka kulit rian ngena ‘Durian Opener’ kelai bejadika Pesta Durian Kabuloh kemari.
BEJADI: Lee nyaup Uggah muka kulit rian ngena ‘Durian Opener’ kelai bejadika Pesta Durian Kabuloh kemari.

MIRI: Orang bekebun ke nerima paung ukai rian ‘Musang King’ ari perintah nengeri ulih ngeripot pekara nya ngagai Opis Betanam Betupi enggau opis menteri nya.

Sapit Kepala Menteri Datuk Amar Douglas Uggah Embas madah, penyilap ke nganjung paung rian ke bukai ngagai bala ke bisi minta paung rian Musang King enda sengaja.  

“Lebuh kitai udah besemaya deka meri paung Musang King, Musang King meh patut diterima. Tang kekadang aku enggau Kepala Menteri Datuk Patinggi kekadang kiruh lalu nadai hari deka meresa Nusang King tauka ukai,” ku iya lebuh ke bejaku bejadika Pesta Rian Kabuloh di Stesyen Pemansik Betanam Betupi Kabuloh pagi kemari.  

Iya ke mega Menteri Betanam Betupi Moden, Tanah Adat enggau Pemansang Kandang Menua madahka nya entara sebana ke diterima ari orang bekebun ke bisi dipilih dalam projek nanam rian Musang King.  

Uggah madah, sebana ke bukai ke bisi diterima iya nya sentang saiz paung rian ke mit.

“Ngambika kitai perintah  GPS ngarapka rayat bisi pengandak ngagai kami. Nyadi nama ke diatur kami nya sigi enggau ati ke lurus mantu rayat,” ku iya.  

Berindik enggau nya, iya minta kerejasama pengari rayat enggau ketuai raban bansa ngambika madah ngagai iya enggau Opis Betanam Betupi enti penanggul nya nyadi ba kandang endur sida.

“Enti bisi penyilap enggau penyalah, madah aja. Kitau ukai sengaja deka nipu rayat,” ku iya.  

Ngagai bala ke betanamka rian Musang King, sida dipinta ngambika nyaga enggau manah ngambika ulih dijual dikena nyungkak penatai pemisi lebih agi.  

Kerejasama enggau bala ke bisi peneleba dalam nanam rian Musang King amai diguna dikena ngajar bala orang betanam betupi enggau chara ke betul ngambika pun bebuah enggau manah sereta lebat.  

Menteri Wang Kedua nya madah, kelimpah ke beratika penaluk ngeluarka buah rian Musang King ungkup makit menua China, perintah nengeri mega eksport rian asal ari Sarawak.  

Sepenayampau dua tan rian asal udah dieksport ngagai menua nya ke dikelala enggau peranak menua nya ke rindu makai rian ke diatu digaga nyadi aiskrim, kuih bulan enggau sup rian.  

“Sida rindu ke rian Sarawak. Kitai bisi isi mirah kuning. Sida rinduka asai ti manis enggau pait mimit,” ku iya.

Ba taun tu, Sarawak nagaka sepenyampau 200 tan eksport tempuyak ke China iya mya nambah ari 100 tan penyampau eksport taun ke udah.  

Sarawak udah nanam sepenyampau 400,000 pun rian. Sepenyampau 12,000 pun ditanam di serata Miri lalu 600 pun ditanam di Kabuloh.

“Bisi dua kompeni ti udah sedia meli nama aja rian ke dikeluarka di Sarawak dikena nangkup peminta ari menua China,” ku iya.  

Sentang pesta rian nya, nya ti keterubah iya diatur di Sarawak ti dikarapka deka diatur enggau besai agi ba taun ti deka datai.  

Sama bisi datai Menteri Perengka Pengangkut Datuk Lee Kim Shin, Menteri Muda Betanam Betupi Moden, Tanah Adat enggau Pemansang Kandang Menua Sarawak  Dr Abdul Rahman Ismail, Menteri Muda Dagang Temuai enggau Main Asal Datuk Sebastian Ting, Menteri Muda Orang indu, Ruang Bilik enggau Pemansang Anak Mit Rosey Yunus, Kaban Parlimen Sibuti Lukanisman Awang Sauni, ADUN Lambir Ripin Lamat, ADUN Telang Usan Dennis Ngau, Sapit Sekretari Perintah Nengeri Datu Ik Pahon Joyik enggau Pemangku Direktor Opis Betanam Betupi Sarawak Dr Alvin Chai Lian Kuet.