MIRI: Menteri Perengka Pengangkut Sarawak ke baru dichiri, Datuk Lee Kim Shin madah opis menteri nya diatu benung dalam proses nusun atur lalu milih beberapa iku pemesai sereta orang ke landik dalam bidang ti bekait, ungkup nangkup pangku pengawa puang ke bisi.
Kelimpah iya enggau sapit iya, Menteri Muda Perengka Pengangkut, Dr Jerip Susil, Perintah Nengeri beberapa hari ke udah mega nyiri Buckland Bangik, nyadi Sekretari Mendam opis menteri nya.
Bejaku ngagai pengarang berita lebuh ke dikerandau ba Opis SUPP Senadin, ditu, bedau lama, iya madahka opis menteri iya nya mega benung dalam proses ngiga pengereja pengawa baru sereta ngatur pengereja pengawa ti udah bisi ti datai ari opis menteri ke bekait, seraya ke merambu pengawa enggau operasyen opis nya.
“Opis Menteri Perengka Pengangkut (MoT) Sarawak mega opis menteri ke baru lalu kediatu, kami benung nusun struktur opis, kelebih agi ngiga pengereja pengawa, orang bepengelandik tauka pemesai ti ngembuan pengelamdik dalam bidang ke bekait.
“Nya kebuah, aku enda ulih nerang enggau silik agi lalu proses (ngemanahka sistem kereja) tu disadang tembu dalam timpuh sebulan tu,” ku iya nerang seraya ke nambah raban sida benung ngiga palan ke manah alai opis menteri nya.
Berindik enggau nya, iya enggau opis menteri iya deka berat agi beratika ba perengka pengangkut di mengeri baka servis bas mensia mayuh.
Nya alai Lee, tajapan MoT bedau beoperasyen ari opis rasmi nya, tang iya udah berengkah gawa, betemu enggau bala ke pemesai dalam industri perengka pengangkut dikena ngulihka timbal enggau penemu ari sida.
“Perengka pengangkut beguna bendar dalam ekonomi. Sekalika sistem perengka pengangkut langit, darat, tasik tauka sungai, kitai patut ngaga sistem pengangkut ti likun agi, ulih dikearap enggau tegap ti diguna rayat lalu ngangkatka ekonomi Sarawak,” ku iya nambah.
“Betemu enggau orang ke bisi tanggungpengawa enggau komuniti dagang, nya deka dikemeratka aku ba timpuh tu, laban kitai dekaka timbal enggau penerang sentang pengerembai enggau isu ti bekaul enggau perengka pengangkut tu.
“Aku deka ninga kediri empu nama ke benung nyadi, sekeda isu ti meri empas ngagai sida lalu ngiga jalai dikena mutar pengelemi dalam sistem ke udah bisi,” ku iya nambah.
“Bedau lama ke udah aku mega udah berandau enggau raban ke megai tanggungpengawa besai dalam industri kapal di nengeri tu lalu udah diberi penerang ari sida sentang pengerembai pemansang ke diatu, perengkaguna enggau pemar ke ditapi,” ku iya.
Berebak enggau nya, Lee madah iya enggau Dr Jerip disadang berandau enggau Sapit Kepala Menteri, Tan Sri James Jemut Masing berundingka beberapa isu enggau pekara ti bekaul enggau opis menteri iya.
Dulu ari nya, Lee ke mega adun Senadin ngena awak iya betemu enggau bala pengari ari mayuh bengkah Gerempung Ukai Dikuasa Perintah (NGO) enggau organisasyen nyengkaum palan pelajar tinggi di opis SUPP Senadin ditu.