Anda di sini

Perintah nengeri seruran deka mantu jalai pengarap bukai

 Uggah nyuaka tepa ngagai Abang Johari kelai terima kasih udah meri bantu belanja dikena ngaga enggau ngemanahka rumah sembiang jalai pengarap bukai, seraya diperatika sida ke bukai kemari. — Gambar Tan Siong Wei
TEPA: Uggah nyuaka tepa ngagai Abang Johari kelai terima kasih udah meri bantu belanja dikena ngaga enggau ngemanahka rumah sembiang jalai pengarap bukai, seraya diperatika sida ke bukai kemari. — Gambar Tan Siong Wei

KUCHING: Perintah nengeri deka terus meri sereta meratika bantu ke patut diberi ngagai jalai pengarap bukai kelimpah ari Islam di nengeri tu.

Kepala Menteri Datuk Patinggi Abang Johari Tun Openg madahka kabinet nengeri udah ngemendarka sebidang tanah perintah ti pemesai tiga ekar dikena ngaga kompleks UNIFOR ba jalai Ong Tiang Swee.

“Lebuh kitai numbuhka UNIFOR, tu bepelasarka siti prinsip aku ke dikembuan aku iya nya ‘sistem nilai’ (value system). Lalu nilai(value) tu amat beguna dalam pengidup kitai tiap hari kelimpah ari mega patut bisi disiplin.

“Maya aku nyadi kepala menteri 11 Januari 2017 nganti Tok Nan, Tok Nan mega sama bisi semangat ti sama, nya alai kitai numbuhka struktur ke nyata ti ulih ngemataka jalai pengarap bukai nengah pengawa numbuhka UNIFOR.

“Kitai deka terus mantu ngaga enggau ngemanahka agi rumah sembiang,” ku iya lebuh bejaku ba pengerami betemu enggau penerima duit bantu UNIFOR ungkup taun 2017 enggau 2018 begulai enggau Kepala Menteri Datuk Patinggi Abang  Johari Tun Openg ti diatur ba sebuah hotel ditu, kemari.

Bejaku baru Abang Johari ti mega nyadi Menteri Wang madahka ulah ti enda bechiping patut dikemeran sereta dikemeratka ba nengeri tu ti diuan pupu bansa ke mayuh jalai pengarap.

Abang Johari ti madahka diri bepegai ba sejarah sereta ajar Islam ti minta ngemeran sereta ngemeratka ulah enda bepilih tang semua jalai pengarap patut dibantu.

“Aku orang muslim aku bepegai ngagai nya, mesti adil ngagai kededua muslim enggau ukai muslim,” ku iya seraya madah nengah chara tu kitai idup dalam pemaik enggau pengelantang.

Dulu ari nya Sapit Kepala Menteri Datuk Amar Douglas Uggah Embas lebuh bejaku ba pengerami nya madahka dalam timpuh dua taun UNIFOR ditumbuhka perintah nengeri udah ngungkupka RM35 juta ti nyengkaum RM15 juta (2017) enggau RM20 juta (2018)

“Ungkup taun tu (2019) terima kasih ngagai kepala menteri laban udah nambahka ungkup belanja ngaagai RM30 juta ngagai UNIFOR.

“Tang ari baruh projek rayat kepala menteri bisi agi meri RM27.3 juta. Lalu enti dipegulaika (UNIFOR (RM30 juta) enggau RM27.2 juta) bisi RM57 juta.

“Aku arap bendar lebuh datai ba ujung taun penyampau nya ulih nambah ngagai RM60 juta. Kitai ngarapka taun baru penyampau agih belanja ngagai UNIFOR enda dikurangka laban diatu bisi chukai petroleum,” ku iya.

Uggah ke megai tanggungpengawa nyaga UNIFOR madahka naka ke diatu UNIFOR semina ulih mantu ngaga enggau ngemanahka rumah sembiang.

Ku iya, UNIFOR nemu bisi tanggungpengawa bukai baka aktiviti sosio-ekonomi ti patut dipejalaika dikena mantu mutarka penanggul kaban UNIFOR nya alai ditumbuhka Lembaga UNIFOR.

“Kitai beterima kasih laban ke udah meri sebidang tanah ba jalai Ong Tiang swee tiga ekar dikena ngaga rumah UNIFOR.

“Kitai beterima kasih ngagai kepala menteri laban ke ngasuh ngiga sebidang tanah lalu ngemendarka dikena ngaga rumah UNIFOR. Tanah tu diberi sereta nadai premium,” ku iya.

Kelimpah ari nya dalam jaku pengelalu Direktor UNIFOR, Opis Kepala Menteri Datu Dr Ngenang Janggu madahka tuju besai ngatur pengerami nya dikena meri terima kasih ngagai perintah nengeri ti diketuaika Abang Johari laban ti ngagihka belanja ngagai gerempung jalai pengarap bukai di nengeri tu baka Kristian, Buddha, Hindu,  Sikh, Tao enggau Bahai.

Pengerami tu mega dikena ngemanahka agi kaul perintah enggau raban bansa ti enda ngira bansa, jalai pengarap enggau jalai pengidup di Sarawak.

“Dua taun ke udah (2017 enggau 2018), perintah udah ngemendarka sepenyampau RM35 juta ngagai UNIFOR dikena mantu ngaga enggau ngemanahka sepenyampau 308 buah rumah sembiang ari mayuh jalai pengarap.

“Ungkup belanja nya udah meri penguntung ngagai lebih 400,000 iku worshippers. Sehari tu bisi 600 iku pengari ke bulih penguntung ari bantu nya nyengkaum ke dibantu ari baruh projek rayat enggau projek tranformaysen menua pesisir,” ku Ngenang.

Sama bisi datai bala menteri, menteri muda, Sekretari Perintah Nengeri Datu Jaul Samion enggau ke bukai.