Anda di sini

Pengamat sebengkah berita semina ulih dikeandal enti diripot ba media chelak

 Wong (tiga kanan) disempulangka Siti (dua ari kanan) begulai enggau mensia mayuh ba sebengkah main ke diatur kemari.
TANKA PENYERAKUP: Wong (tiga kanan) disempulangka Siti (dua ari kanan) begulai enggau mensia mayuh ba sebengkah main ke diatur kemari.

SIBU: Pengamat sebengkah berita semina ulih dikeandal enti diripot ba media chelak tauka surat berita enti dibida baka ke dibantai nengah media rama.

Kaban Kunsil Nengeri (ADUN) Pelawan David Wong madah, berita ke diayan ba surat berita endang diripot nitihka atur pegai tanggungpengawa nyadi pengarang berita ti dikemeran pengarang.

Tang ku iya, ba media rama, sapa-sapa ulih ngarang berita kediri empu lalu mayuh agi berita bula.

“Kitai nemu mayuh orang diatu kelebih agi rebak baru macha berita nengah media rama.

“Enda semua tauka tebal agi berita ke diayan ba media rama digaga enda temu pengamat lalu udah mayuh dipeda kitai nyadi,” pia ku iya madah maya ‘Program Merdeka Komuniti KRT sitak Sibu 2019’ di Taman Permai ditu, kemari.

Sama bela datai maya tu iya nya Pemesai Opis Penyerakup Bagi Menua Sibu Siti Nurfatimah Hussen.

David mega madah, opis perintah ti bekaul mega patut chakah agi nyidi orang ti ngaga berita bula ba media rama.

Ku iya, enti laun diputar, pekara nya tau bendar nyeruga pengelikun nambahka nya, berita ke dibantai deka jampat dibacha sereta dikunsi mensia mayuh.

“Amat menua kitai enda nyekat rayat bejaku tang pengelebih nya bisi lebas.

“Ambika banding bisi nya bejaika pegai perintah. Enda ngawa enti pekara nya amat tang anang ngaga berita bula lebih agi bekaul enggau sentimen rayat.

“Kitai enggai pengelebih ke diberi tu nyau ngachau tikas pemanah kaul rayat menua tu,” ku iya madah baru.

Berebak enggau tu mega, Wong madah, penemu ke enda sebaka ba politik enda tau nyadika entara ba pemanah kaul rayat.

“Parti politik ulih datai lalu tau mega lenyau tang menua kitai tu mengkang dalam Malaysia.

“Bisi sekeda madah, perintah Pakatan Harapan (PH) tu enda manah. Kitai ukai ngaga pemutus tang kitai ngaga demokrasyen.

“Nya kebuah, kitai bisi ngundi. Taja enda sama penemu politik kitai anang enggai bepeda enggau pangan diri laban Malaysia tu diempu semua.

“Pekara ke beguna iya nya, kaul pupu raban bansa meseti ditanka ngambi seruran tegap ungkup pengelantang semua,” ku iya madah.

Kelimpah ari nya, Wong mai semua rayat saum singkang mai Malaysia dipebasa ba renggat dunya sereta nyadi menua betikas tinggi ba komuniti global.

Program nya kemari digulu 42 buah Kawasan Rukun Tetangga (KRT) ari pelilih Selangau, Kanowit enggau Sibu sereta 14 buah Tabika Perpaduan (13 Sibu enggau sebuah ari Kanowit).