Anda di sini

Pelin ngemanahka Palan Pemandang Seni ditetapka berengkah pengujung taun tu

 Sebengkah aksyen dalam teater muzikal ‘Ola Bola’ ti ngerinduka ati bala temuai ke datai meda.
RICHAH: Sebengkah aksyen dalam teater muzikal ‘Ola Bola’ ti ngerinduka ati bala temuai ke datai meda.

KUCHING: Pelin pemansang ngemanahka agi Kunsil Nengeri (DUN) lama nyadi sebuah Palan Pemandang Seni ditimpuhka berengkah ujung taun tu.

Menteri Dagang Temuai, Seni enggau Main Asal, Datuk Abdul Karim Rahman Hamzah madahka penembu palan nya ila deka begunaka pengereja pengawa ti landik enggau pandai dalam bidang seni.

“Kami benung ngemutuska pelin nya sereta engka berengkah digaga ujung taun tu.

“Palan tu deka disikap ngena kereban elektronik ngambika bisi dikena pengemeran seni sereta udah tentu mega begunaka belanja besai,” ku iya ti enda madah penyampau ungkus belanja dikena ngemanahka DUN lama ke digaga nyadi Pusat Persembahan Seni.

Iya madahka pekara nya lebuh dikerandau pemberita pengudah tembu persembahan teater muzikal ‘Ola Bola’ ba Stadium Perpaduan malam ensanus.

Nitihku Abdul Karim pekara nya dua kali udah dibai ngagai Kepala Menteri Datuk Patinggi Abang Johari Tun Openg sereta bisi timbal positif ngagai pelin perambu ke dibantaika opis menteri iya.

Abdul Karim malam ensanus nyempulang Abang Johari enggau bini iya Datin Patinggi Datuk Amar Juma’ani Tun Tuanku Bujang enggau Sapit Kepala Menteri Tan Sri Datuk Amar Dr. James Jemut Masing enggau bini iya Corrine @ Connie Bua Nyipa ngemataka Teater Muzikal Ola Bola.

‘Ola Bola The Musical’ iya nya sebuah teater Malaysia ti diambi ari filem 2016 Ola Bola digaga Chiu keng Guan sereta digaga baru ba taun 2018 ulih orang ke numbuh enggau ngempu syarikat Enfiniti Production, Datin Seri Tiara Jacquelina Eu Abdullah.

Urang 2,500 iku orang datai ngemataka teater nya ti lalu ulih ngangkatka semangat sayau sereta talukka menua nyerumba bulan Kemerdekaan.

Tiara Jacqueline lebuh dikerandau madahka pengaga ati diri sereta temegah ati meda sukung rayat Sarawak enggau perintah nengeri ti datai ngemataka teater nya pengelama lebih ari 2 jam.

Bisi mega dipandangka ba ‘live streaming’ ti keterubah dalam sejarah ari Asia Tenggara ba Kuching, ‘Ola Bola the Musical’ deka dipandangka ba Facebook enfiniti pukul 7.30 malam.

Entara pelakon ti ngemujurka teater muzikal nya iya nya Iedel Putra, Tony Eusoff, Altimet, Douglas LIm, Nabila Huda, Melissa Ong, Brian Chan, Abi Manyu, Luqman Hafidz, Hafeez Mikail enggau Lim Jian Wen.

Wonda Coffee mega udah udah bejadika Wonda Coffee Sarawak Edition ti bisi ikonik burung Kenyalang enggai seni raban bansa bukai di Sarawak ensanus.

Sida Wonda Coffee mega udah ngeluarka kopi edisi terhad nitihka nengeri. Lalu Wondo Coffee Sarawak bisi asai penuh kopi sereta pait mimit ti chukap nyamai ngagai orang ti rindu ngirup kopi di nengeri tu.

Sama bisi datai bini Abdul Karim, Datin Zuraini Abdul Jabbar enggau laki Tiara Jacquelina, siku orang dagang enggau kala nyadi Menteri Betanam Betupi Malaysia, Datuk Seri Mohd Effendi Norwawi.