SIBU: Mensia mayuh dipinta ngena Servis ‘Tambah Nilai Farmasi’ (Value Added Services-VAS) beambika ubat ngambika ulih ngurangka penyekut berintai di klinik pengerai.
Pemesai Opis Pengerai Bagi Menua Sibu Dr Teh Jo Hun madah servis tu beguna amat ngagai mensia mayuh ke tuju ngemudahka pesakit beambika ubat sida.
Iya gaga ninga berita manah ba bansa servis tu seraya nambah bisi diangkatmanah kenyau beberapa taun tu ke alai beratur panjai ngambi ubat udah dikurangka.
“Servis tambah nilai tu beguna amat lalu manah ungkup mensia mayuh. Kami arap mayuh agi orang deka ngena servis bansa tu.
“Aku bejaku enggau bala farmasi lalu sida ulih mantu ngiga ubat enggau jampat sereta ngena. Tu mih pekara ke beguna amat,” ku iya nerang ngagai pemberita pengudah pengerami ‘Minggu Penyusuan Susu Ibu Sedunia’ renggat Bagi Menua Sibu 2019 di Klinik Pengerai Jalai Oya ditu kemari.
Dr Teh madah munyi nya lebuh dipinta nerang bekaul timbal mensia mayuh sentang servis tambah nilai farmasi ke udah ngurangka jam nganti lama alai ngambi ubat sida.
Berebak enggau nya, iya nerangka nyewa dua buah rumah kedai di belakang Klinik Pengerai Jalai Oya ke alai dikena nyadi palan farmasi agi dalam diproses.
Dr Teh madah bisi penanggul teknikal sebedau tu lalu iya deka dipejalaika enda lama agi.
“Tang kebendar, iya udah dikemendarka Opis Menteri Pengerai Malaysia (KKM),” ku iya.
Dulu agi ari tu, ba jaku iya, iya madah sida laki bisi pangku pengawa besai meri sukung ngagai bini dalam mantu nusuka anak.
Kelimpah ari nya, Dr Teh madah seraban sida ke nyukung pengawa nusuka anak mega beguna amat dalam meransang enggau meri lalau ngagai sida ke baru begelar indai nengah bekunsi peneleba sida.
Pengerami ‘Minggu Penyusuan Susu Ibu Sedunia’ renggat bagi menua Sibu 2019 udah dipejadika Kaban Parlimen Sibu Oscar Ling.