Anda di sini

JPNS, kepala pengajar, prinsipal bisi kuasa ngetuka enda lama P&P nyema IPU lebih 200

 Uggah lebuh dikerandau raban pemberita pengudah tembu pengerami betemu enggau penerima duit bantu Unit Pekara Jalai Pengarp Bukai (UNIFOR) Taun 2017 enggau 2018 enggau Kepala Menteri Datuk Patinggi Abang Johari Tun Openg, kemari. — Gambar Roystein Emmor
NYAUT TANYA: Uggah lebuh dikerandau raban pemberita pengudah tembu pengerami betemu enggau penerima duit bantu Unit Pekara Jalai Pengarp Bukai (UNIFOR) Taun 2017 enggau 2018 enggau Kepala Menteri Datuk Patinggi Abang Johari Tun Openg, kemari. — Gambar Roystein Emmor

KUCHING: Opis Pelajar Nengeri (JPNS), kepala pengajar sereta prinsipal bisi kuasa ngetuka sementara sesi belajar enggau ngajar (P&P) nyema Indek Pengamah Angin (IPU) lebih 200 dalam timpuh 24 jam.

Sapit Kepala Menteri, Datuk Amar Douglas Uggah Embas madahka pemutus nya ulih digaga JPNS, kepala pengajar sereta guru besar bepelasarka Prosedur Operasi Standard (SOP).

“Pemutus (ngetuka sementara sesi belajar enggau belajar) kitai serah ngagai Direktor JPNS, nentuka sekalika patut ditutp tauka enda.

“Kitai bisi SOP, enti IPU terus dalam timpuh 24 jam lebih ari 200 dia bala guru besar tauka kepala pengajar ulih ngaga pemutus nutup sekula. Aku nadai kuasa ngaga pemutus,” ku iya ti nyadi Chairman Komiti Mutarka Penusah Ngenyit Sarawak (JPBNS) dikerandau raban pemberita kemari.

Iya dikerandau pengudah tembu pengerami betemu enggau penerima duit bantu Unit Pekara Jalai Pengarp Bukai (UNIFOR) Taun 2017 enggau 2018 enggau Kepala Menteri Datuk Patinggi Abang Johari Tun Openg, ti diatur UNIFOR ba sebuah hotel ditu.

Berebak enggau Uggah madahka bepelasarka aum begulai enggau ejensi ti bekaul baka Opis Rampa Menua Sarawak (JAS), Lembaga Sumber Asli dan Alam Sekitar (NREB), Jabatan Pertahanan Awam Malaysia (JPAM), sida nya deka nyendiaka tuping mua.

“NREB enggau JAS deka nyadung tuping mua, diatu udah bisi sekeda bekal. Lalu nya udah diberi ngagai Opis Pelajar, udah diberi tadi.

“Lalu sida (JPNS) deka nentuka bagi sekula ke diberi tuping mua nya, tagit kitai endang nembiak,” ku iya.

Kelimpah ari nya Uggah ti mega Menteri Wang Kedua ngarapka perintah besai ngiga chara ti lebih engkeman enggau menua ti berimbai lebih agi  Indonesia baka ni chara ulih madamka api ulih dipejalaika.

Kuala Lumpur patut berandau enggau sida di Jakarta bakani ulih bekerejasama nitihka sempekat Roadmap on ASEAN CoorporationTowardsTransboundary Haze Pollution with Mean of Implemetation.

Ba kitai Ku Uggah, enti penusah angus dalam menua tu empu lebih senang laban kitai ulih ngerah semua ejensi kitai bakani ulih betapi enggau penanggul tu baka di Miri enggau Sri Aman.

“Tang lebuh sebun asap tu ngelui tauka meraka gari antara menua, terebai ari Kalimatan, tu penanggul sereta majak balat agi laban angin bepuput tunga ngagai kitai kitu.

“Kitai deka terus bejaku enggau perintah besai sereta baka di Miri sida amat mantu kitai sida ngajung Bombadier dikena nulung kitai. Tang berandau enggau Jakarta tu tanggungpengawa perintah besai,” ku iya seraya mai sama besampi ngambika sebun asap tu ulih kurang.

Lebuh ngenang pengawa menih remang ngambika ujan iya madahka pekara nya bepanggai ngagai remang sereta pengawa nya enda ulih mujur enti titik angat di Kalimantan agi mayuh asap sereta angin bepuput tunga ke nengeri tu.