MIRI: Gabungan Parti Sarawak (GPS) deka terus ngetanka hak orang bumiputera nitihka atur undang-undang nyengkaum dalam nentuka tanah Hak Adat Asal Bumiputera (NCR) meruan dijaga.
Kepala Menteri Datuk Patinggi Abang Johari Tun Openg madah, ubah Kanun Tanah Sarawak nya entara komitmen perintah nengeri ukai semina ngenukuka tanah NCR, tang mega meri kuasa penuh ngagai orang bempu tanah bumiputera.
“Nya sebagi tanggungpengawa kitai ngemansang enggau nyaga tanah bumiputera kelimpah kitai terus ngetanka hak bukai baka minyak enggau gis sereta imigresyen.
“Pia mega, kitai deka ngetanka enggau ngemansangka Sarawak nitihka atur undang-undang ke patut dipebasaka kitai.
“Nyema kitai bisi penanggul, kitai nitihka undang-undang ke bisi, kitai mai ngagai kort lalu meri ngagai orang ke landik ngemutarka nya. Pekara ke amat kitai deka terus ngetanka hak kitai ba ditu,” terang iya maya ‘Forum Kanun Tanah (Pindaan) 2018 ‘ bepalan di Pullman Miri Waterfront, ditu kemari.
Sama bisi ngulu pengawa tu nya Sapit Kepala Menteri Sarawak Datuk Amar Douglas Uggah Embas, Menteri Utiliti Datuk Seri Dr Stephen Rundi Utom, Menteri Perengka Pengangkut Datuk Lee Kim Shin, ex-Sapit Kepala Menteri Datuk Patinggi Alfred Jabu Numpang, Sekretari Perintah Sarawak ke mega Chairman Komiti Pengatuir Pengawa ‘Forum Kanun Tanah (Pindaan) 2018’ Datu Jaul Samion, Sapit Sekretari Perintah Sarawak Datu Ik Pahon Joyik, bala menteri muda sereta dif-dif ke dipebasa ke bukai.
Taja pia terang Abang Johari, iya napi pemar lebuh bisi orang bempu tanah deka nukar status tanah ngagai zon champur.
“Tu meh pemar ke patut ditapi kitai, endang amat nuan bisi kuasa ba tanah empu nuan tang nuan patut mega ngetanka hak nya taja nadai modal dikena ngemansangkanya.
“Laban tanah nya aset enggau hak kitai, bisi chara bukai alai kitai ngemansangka tanah nya. Kitai mayuh nerima peminta nya dikena nukar status ke zon champur nya tang bisi ke udah dikinsil kitai,” ku iya.
Berebak enggau nya, Abang Johari ngelalau rayat Sarawak ngambika enda bepechah enggau bela fokus dalam terus ngetanka nengeri Sarawak.
“Kitai bisi chara kitai empu, anang mudah lemi semengat. Kitai patut begempung nyaga enggau ngetanka hak kitai di Sarawak,” ku iya.
Dulu agi ari tu, Uggah ke mega penyanding penemu ‘Forum Kanun Tanah (Pindaan) 2018’ ba jaku iya meri terima kasih ngagai Abang Johari ba atas penyiru ke bebendar mutarka isu tanah rayat ditu.
Iya deka tetiap pesereta ngena peluang forum nya dikena nerang enggau nyadung penerang ti engkeman bekaul isu tanah di nengeri tu ngagai komuniti kandang menua tu.
Lebih 350 iku pesereta ke mungkur bala ketuai raban bansa, pemesai perintah, pengari Gerempung Ukai Dikuasa Perintah Bumiputera ari Limbang, Miri enggau Bintulu ke udah nyereta dalam forum nya enggau dua licha.
Licha keterubah nya bekaul ‘Kanun Tanah (Pindaan) 2018 dan Land (Native Communal Title) Rules 2019’ ari Peguam Besai Nengeri Sarawak, Datuk Talat Mahmood Abdul Rashid sereta diketuaika Sapit Speaker Kunsil Nengeri (DUN) Datuk Gerawat Gala.
Pia mega licha kedua nya ‘Proses dan Prosedur Permohonan Native Communal Title (NCT)’ ari Opis Tanah enggau Survei Sarawak lalu diketuaika Menteri Muda Undang-undang, Kaul Nengeri enggau Perintah Besai enggau Mantau Projek Sharifah Hasidah Sayeed Aman.