Anda di sini

Malaysia deka nganjung nota diplomatik ngagai Indonesia

 Munirah dalam aum pemberita bekaul enggau isu sebun asap ngelui garis antara menua, seraya disempulang Saifful (kanan), kemari. — Gambar Roystein Emmor
DEKA NGATUR KEREJASAMA: Munirah dalam aum pemberita bekaul enggau isu sebun asap ngelui garis antara menua, seraya disempulang Saifful (kanan), kemari. — Gambar Roystein Emmor

KUCHING: Malaysia enggau naka pengelengkas ke ulih deka nganjung nota diplomatik ngagai Indonesia dikena mutarka isu sebun asap ngelui tauka meraka garis antara menua.

Sapit Menteri Tenaga, Sains, Teknologi, Rampa Menua enggau Ubah Iklim (MESTECC) Isnaraissah Munirah Majilis madahka, Malaysia deka terus bekerejasama enggau menua ti berimbai lebih agi Indonesia ba pengawa mutarka isu sebun asap ngelui garis antara menua.

“Ba renggat opis menteri, MESTECC deka  ngadu tauka ngatur ngambika nota diplomatik dikenataika ngagai Indonesia, awakka aksyen ulih dipejalaika enggau lengkas kena madam enggau nyeliah penusah angus nyadi baru.

“Nota diplomatik tu deka dianjung enggau naka pengelengkas ke ulih, kami diatu benung dalam ngelangkar ba peringkat kepenudi,” ku iya lebuh dikerandau raban pemberita ba Opis Rampa Menua (JAS) Sarawak di Wisma STA ditu, kemari.

Dulu ari nya iya nyadi chairman aum isu bekaul enggau sebun asap ti sama digulu JAS, Lembaga Sumber Asli dan Alam Sekitar (NREB) Sarawak, Opis Bomba enggau Penyelamat Malaysia (JBPM) sereta ke bukai.

Lebuh ditanya inisiatif tauka chara bukai dikena perintah mutarka isu sebun asap ti nyadi tiap taun, Munirah madahka, bulan Ogos tu tadi Malaysia bisi mantaika isu sebun asap ngelui garis antara menua dalam aum ke-21 Technichal Working Group (TWG) enggau Sub-Regionla Ministerial Steering Committee (MSC) on Transboundary Haze Pollution.

Iya madahka aum nya dipasuk lima buah menua ke nyadi kaban MSC iya nya Brunei Darussalam, Indonesia, Singapura, Thailand enggau Malaysia.

“Maya baum nya menua ke nyadi kaban MSC besemaya deka bejag matau, ngangkatka agi chara nagang tauka nyeliahka dikena ngurangka agi penyadi sebun asap ngelui garis antara menua maya hari angat entara bulan Ogos ngagai Oktober 2019.

“Kaban MSC mega udah besetuju ngangkatka kerejasama dikena betapi enggau pengamah sebun asap ti meraka garis entara menua ti lebih efisyen senipak enggau Roadmap on ASEAN Coorporation Towards Transboundary Haze Pollution Control with Means of Implementation.

“Bepelasarka kerejasama nya, dikearapka semua menua kaban MSC benung naka ulih bebendar deka mutarka isu sebun asap meraka garis antara menua,” ku iya.

Pansik enggau penerit adat deka terus dipejalaika lebih agi ba titik angat ti ditemu dalam menua, taja pia sebun asap ngelui garis entara menua iya nya kebuah besai sebun asap nyadi serata menua, ku iya.

“Berindik ari pekara nya mensia mayuh dikeingatka ngambika enda betunu chara tebuak, sama besaup madamka api sereta ngeripot kes betunu chara tebuka tauka penusah angus ngagai JBPM ba lumur 999 enggau JAS ba talian bebas tol, 1-800-88-2727,” ku iya.

Ba aum pemberita ke sama ditanya sekalika operasyen menih remang deka dipejalaika, Munirah madahka atur nya dipejalaika nyema bisi pematut.

“Pengawa menih remang nya engka bisi laban tu kitai deka bulih input ari Opis Pengemata Gaya Hari sereta deka dipejalaika Agensi Pengurusan Bencana Negara (NADMA),” ku iya seraya madah pembenihan awan mega bepanggai ngagai gaya hari.

Bisi ba aum pemberita nya, pemangku Direktor JAS Sarawak Ahmad Saifful Salihin enggau Penolong Pengarah Operasi JBPM Sarawak Tiong Ling Hii sereta ke bukai.