Anda di sini

Kompeni besai ke nyaup perintah deka diberi insentif

 Uggah bepeluang ngujika asil betanam betupi ti udah diproses, maya bejalai ba palan pemandang ke diatur pengudah pengawa nyain MoA enggau MoU di Wisma Bapa Malaysia ditu kemari, kemari lalu sama bisi dia Sagah (tiga kiba).
PENGAWA PEMANDANG: Uggah bepeluang ngujika asil betanam betupi ti udah diproses, maya bejalai ba palan pemandang ke diatur pengudah pengawa nyain MoA enggau MoU di Wisma Bapa Malaysia ditu kemari, kemari lalu sama bisi dia Sagah (tiga kiba).

KUCHING: Perintah nengeri diatu benung beratika deka meri insentif ngagai kompeni besai kelebih agi ti mantu perintah ngemansangka orang betanam betupi menua pesisir.

Sapit Kepala Menteri Datuk Amar Douglas Uggah Embas madah, nya dikena ngelai sukung ngagai kompeni besai ke udah nempa kerejasama enggau perintah ba pengawa mantu orang betanam betupi dalam mayuh bengkah bidang.

“Kami benung beratika insentif ke diberi ngagai kompeni besai,laban kita udah mantu kami (perintah) sereta perintah patut nyukung program kita, ti lebih ngagai ‘win -win situation’.

“Nya alai kami deka terus berandau begulai enggau sekeda kompeni besai ngambika kami bulih timbal ari kita semua kelebih agi dalam kandang dua bulan ti deka datai ke alai kami nembuka pelin Langgur Pemansang Malaysia Lumpar Ke-12 (RMK-12),” ku iya.

Iya madahka pekara nya lebuh bejaku maya ngemataka pengawa nyain Sempekat Pemereti Ati (MoU) enggau Sempekat Semaya (MoA) entara perintah nengeri ti diarika Opis Betanam Betupi Sarawak enggau sekeda kompeni besai ba Wisma Bapa Malaysia ditu, kemari.

Uggah ti mega Menteri Betanam Betupi, Tanah Adat enggau Pemansang Kandang Menua madah, berindik ari nya opis menteri nya lebih agi begunaka timbal ari kompeni besai pasal bagi insentif ke patut.

“Nengah pekara ti baka tu kitai ulih terus bekerejasama sereta mai indutri betanam batupi kitai nuju ngagai ke lebih tinggi lalu ke pemadu beguna ulih mantu ngangkatka penatai pemisi betanam betupi kitai di menua pesisir,” ku iya.

Iya madahka Kepala Menteri Datuk Patinggi Abang Johari Tun Openg, udah netapka Sarawak deka nyadi pengeksport beresi produk pemakai lebuh manggai ba taun 2030.

Terang iya, nya tentu deka muka mayuh peluang gawa, penumbuh ekonomi  enggau berebak enggau tu deka nyadi chara mutar tauka munaska penyeranta di nengeri tu kelimpah ari meri pengarap baru ngagai orang betanam betupi di menua pesisir.

Ngenang pasal program ke diatur nya, Uggah madah enda ngenggaika ngelama tu mayuh sempekat ti disain entara entiti.

“Tang kekadang sempekat nya semina tinggal semaya aja sereta nadai asil...nya alai sehari tu aku madah ngagai semua ke ngambi bagi, nyengkaum direktor aku deka nentuka enda ngira nama sempekat ke disain nyengkaum ke sehari tu patut bisi asil.

“Ari nya baru kitai ulih meda nama pengawa ti dipejalaika kompeni besai enggau pengawa perintah dalam ngemansangka komoniti orang betanam betupi kitai kelebih agi ba pengawa ngangkatka penatai pemisi sida,” ku iya.

Iya madah, kerejasama enggau kompeni besai mayuh meri empas ti chukup manah kelebih agi ngagai raban orang betanam betupi di menua pesisir.

Ku Uggah, ambika chunto kerejasama ti mungkur kompeni besai entara perintah nengeri enggau Top Fruits ba pengawa ngeksport pes rian ke China.

“Top Fruits, kompeni besai ari Johor lalu kitai ngaga pemutus ngelaluka sida ke Sarawak nengah kerejasama tu laban kompeni tu bisi peneleba lebih 30 taun syarikat dalam aktiviti  ba renggat pengemun.

“Asil ari kerejasama tu, kitai mujur ngeksport pes rian keterubah ke China taun nyin kemari ti lebih 20 tan lalu pun taun tu kitai ngeksport 100 tan...kitai ngarapka taun tu kitai ulih ngeksport pes rian nyentuk 200 tan tauka 300 tan,” ku iya.

Bisi datai dua Menteri Muda Opis Menteri Betanam Betupi, Tanah Adat enggau Pemansang Kandang Menua Datuk Roland Sagah Wee Inn enggau Dr Abdul Rahman Ismail.