Anda di sini

Kelala sereta gaga barang ke ulih dieksport

Advertisement

KUCHING: Orang dagang dilalau ngambika ngelala sereta ngasilka barang ke ulih dieksport tauka tetapika peminta makit awak ke ulih setipak enggau penyakah perintah ngangkatka pemanah infrastruktur enggau penyambung di nengeri tu.

Kepala Menteri, Datuk Patinggi Abang Johari Tun Openg madah, pengawa nentuka bagi barang ke diasil sereta dieksport pekara ti patut dikemeratka orang dagang lalu perintah bejalaika tanggungpengawa nyendiaka infrastruktur tauka penyambung dikena ngerembaika produk orang dagang.

Iya madahka perintah nengeri ngeluarka mayuh belanja dikena nyikap sereta ngemanahka agi infrastruktur ti nyengkaum bekal ai enggau kuasa karan.

“Kitai fokus ngagai pengawa ngangkatka agi pemanah infrastruktur penyambung Sarawak ngambika Sarawak ulih nyadi hub eksport dikena kitai ngenegapka produk kitai ditu.

“Lalu diatu bepanggai ba orang dagang empu nentuka bakani sida ulih nyadi lebih kreatif, ngelala peminta makit enggau nguji ngasilka barang ke ulih tetapika peminta makit.

“Perintah semina nyendiaka fasiliti nyengkaum servis ti efesyen dikena ngiring komuniti dagang,” ku iya lebuh bejaku maya bejadika Hari Eksport Sarawak 2019 ti diatur Opis Menteri Dagang Antarabansa enggau Industri, Terminal Industri enggau Pemansang Orang Dagang ba sebuah hotel ditu, kemari.

Lebuh ti ngenang pasal ngangkatka pemanah fasiliti tauka infrastruktur palan penyangkai kapal ti bekaul enggau pengawa eksport import, Abang Johari madahka Ordinan Lembaga-Lembaga Pelabuhan 1961 (Sarawak) deka dipansik tauka diperesa baru dikena nentuka palan penyangkai kapal Sarawak dikemanah sereta diatur ngena chara moden.

Ku iya, sekeda fasiliti tauka kereban ba palan penyangkai kapal patut diangkatka agi pemanah awakka ulih setipak enggau peminta guna kemaya hari tu.

Iya madahka perintah nengeri ukai ngelanggur deka ngubah tang deka nyerenih Ordinan Lembaga-Lembaga Pelabuhan 1961 (Sarawak).

“Nama utai ke disebut aku iya nya kami deka ngenegapka agi palan penyangkai kapal Sarawak. Reti nya kitai deka nyerenih ordinan kitai dikena napi peminta fasiliti palan penyangkai kapal moden.

“Laban diatu orang (eksport enggau import) nuju ngagai pengawa sistem pengangkut entara ‘mod’ ti ngena kontena sereta ngatur palan penyangkai kapal nengah chara moden. Nya kebuah kitai patut nyerenih ordinan kitai,” ku iya lebuh dikerandau raban pengarang berita pengudah bejadika Hari Eksport Sarawak 2019.

Lebuh dipinta ngenang pasal belanja ke dikena perintah ngangkatka agi pemanah fasiliti ba palan penyangkai kapal menua tu, Abang Johari madahka pekara nya deka dipansik dulu.

“Pekara nya (anggar belanja) bedau ulih ditetapka, nya kebuah kitai patut mansik dulu ordinan kitai. Kitai meda operasyen palan penyangkai kapal, engka kitai patut ngangkatka pemanah sekeda fasiliti,” ku iya.

Sarawak bisi empat palan penyangkai kapal iya nya Palan Penyangkai Kapal Kuching, Rajang, Bintulu enggau Palan Penyangkai Kapal Miri.

Kelimpah ari nya lebuh ti ngenang pasal terminal industri, Abang Johari madah perintah nengeri benung merambu ngaga nya dikena bejalaika pengawa eksport enggau import produk petrokimia.

Palan alai ngaga terminal industri nya bepanggai ba dini endur kompleks petrokimia ti deka dikemansangka di nengeri tu. “Terminal ulih digaga semak enggau palan penyangkai kapal ke udah bisi tauka enda laban nya (petrokimia) ulih ngeruga..endur iya ke patut agi diperambu.

“Bisi perambu deka ngaga kilang penapis, reti nya kilang nya patut disikap enggau terminal sereta jelatung lalu pengelikun mega patut dikemeratka,” ku iya.

Bisi ngulu pengerami nya, Sapit Kepala Menteri ti mega Menteri Pemansang Mengeri enggau Pengeraja Asal II Datuk Amar Awang Tengah Ali Hasan, Speaker Kunsil Nengeri Datuk Amar Mohamad Asfia Awang Nasar, Menteri Perengka Pengangkut Datuk Lee Kim Shin, Menteri Muda Pemansang Dagang Antarabansa enggau Industri, Terminal Industri enggau Pemansang Orang Dagang Datuk Mohd Naroden Majais sereta ke bukai.

  • oleh
  • Advertisement