Anda di sini

Forum 'Maju atau Mundur' deka diatur kena 7 Sept tu

Advertisement
 Forum ‘Maju atau Mundur’ ti diatur Gerempung Prihatin Sibuti enggau Pelilih Miri.
ARAM DATAI: Forum ‘Maju atau Mundur’ ti diatur Gerempung Prihatin Sibuti enggau Pelilih Miri.

MIRI: Komuniti di kandang menua tu ti deka nemu bekaul pemansang ti pemadu baru Sarawak sepengelama 56 taun numbuhka Malaysia, semua dikangau datai nyereta forum 'Maju atau Mundur' kena Hari Enam, 7 September tu.

Form ti diatur Gerempung Prihatin Sibuti enggau Pelilih Miri nya deka digaga bepalan ba Pustaka Negeri Sarawak Pampang Miri, berengkah ari pukul 2.30 nyentuk 5 lemai.

Jurujaku pengatur program tu Zubaidah Suboh madah, forum tu nadai bayar tama lalu raban akademik ti tebilang ari Universiti Malaya Prof Madya Dr Awang Azman Awang Pawi mega deka dikangau datai nyadi pengelicha.

Nitih ku iya, pengelicha nya Sapit Direktor Akademik Bidang Melayu Unversiti Malaya ti ngembuan lebih ari 20 taun peneleba lalu udah ngaga mayuh pansik nyengkaum bekaul politik sereta pemansang Sarawak.

Kelimpah ari Prof Madya Dr Awang Azman, sama bisi datai bekunsi buah runding ti mega nyadi pengelicha, Malvina Albert Klinsing ari Gerempung Pemikir Dayak Sawak (Dayak Think-Tank Association Sarawak).

“Forum tu iya nya sebagi ari pengawa ungkup projek 'outreach' gerempung beserimbai enggau ngintu Hari Malaysia 2019.

“Beserimbai enggau nya, kitai ngelalu mensia mayuh di kandang menua mengeri besai Miri ngambika sama datai ngelimpangka awak lalu nyereta forum tu,” ku Zubaidah nambah, iya ke mega kaban Majlis Tertinggi Orang Indu Parti Keadilan Rakyat (PKR).

Sida ke deka nemu enggau silik bekaul forum nya ulih betelefon ngagai Chiew ba lumur 010-982 8390.

Advertisement