KUCHING: Presiden Gerempung Bansa Dayak Sarawak (SDNU) Tan Sri William Mawan Ikom deka ke komuniti Dayak ngatur simposium sentang penusah enggau chara nyeliah penusah angus nyadi di rumah panjai sereta nyendiaka perambu ba pekara pengelikun.
Mawan ke mega Kaban Kunsil Nengeri Pakan madah,penesal ati enggau standard bantu ke diberi ngagai orang ke tasah kena penusah angus nya patut dikerandauka ba simposium ke enggau tuju dikena ngelangkar resolusyen ti deka diserah ngagai perintah Sarawak.
Nyebut silik agi,Mawan madahka kaul pengidup bansa asal baka di rumah panjai ba maya ke diatu mega patut dikerandauka.
“Penusah angus di rumah panjai meri peneleba penesal ati ngagai peranak rumah panjai ti balat agi meri pengerusak ari ke disebut, lalu api ti nganguska sesebuah rumah nyadi sebarang maya deka meri empas ngagai mensia mayuh ti tau meri sida asai pengelenyau ba utai ke dikemisi enggau reta tengkira. Bisi enda sida ngambi insurans? Bisi enda barang bagi kompeni insurans deka meri polisi ke manah dikena meri bungkur insurans ngagai rumah panjai ari sebarang penusah ngenyit?,” ku iya madah ngagai The Borneo Post kemari.
Ku Mawan, perintah ke diatu patut ngulihka timbal ari mensia mayuh kelebih agi peranak rumah panjai ba sentang pekara tu,laban diatu mih maya enggau lengkas. Iya madah munyi tu berindik ari penemuai iya ngagai Rumah Andrew Lawai ba Jagoi Pakan di Julau Sarikei kena Hari Tiga tu tadi.
Rumah panjai tujuh pintu nya udah angus urung pukul 8.30 malan kena malam Hari Dua, ti diuan 20 iku nyengkaum dua iku anak mit, ke diatu nadai alai rumah diau diau sementara.
Penusah angus nya nyadi berengkah ari dapur sepintu ari rumah panjai nya. Taja pia nadai diripot bisi peranak rumah panjai nya bebadi tauka bakal.
Peranak rumah panjai nya diatu ngenduh ba dewan komuniti Opis Kaunsil Meradong-Julau di Pakan.
Lebuh ke ngabas Rumah Andrew Lawai kena Hari Tiga nya, Mawan meri bantu ari geran perintah sepenyampau RM40,000 ngagai Komiti Pengelikun enggau Pemansang Genturung Pendiau (JKKK), dikena mantu sida nyungkur taba baru ungkup rumah panjai sida sereta dikena sida meli sekeda perengka dikena berumah.
Ku Opis Pengerara Api enggau Penyah Penusah Nengeri (Bomba), taun tu aja (nyentuk 3 Sept), sida udah ngerikodka 14 kes rumah panjai angus di serata Sarawak nyengkaum Rumah Andrew Lawai.
Sri Aman ngerikod dua kes lalu Betong (3), Sarikei (2), Mukah (1), Sibu (2), Bintulu (2), Miri (2).
Naka ke diatu Bomba semina ulih nganggarka RM10,116,50 penyampau pengerugi reta tengkira ungkup 12 rumah panjai nya lalu penyampau reta tengkira ti ulih diselamatka iya nya RM12,993,500.
Taun tu, penusah angus udah meri penusah ngagai lebih 1,300 iku, nabanka nyawa siku lalu empat iku balat bakal. Ke mati ba penusah angus nya siku indu timpang pendiau ke beumur 43 taun.
Ari 14 ke nyadi, lapan angus lengis, sebuah rumah panjai 90 peratus angus lalu ke bukai nya semina angus sepintu nyentuk tiga pintu aja.
Batang kebuah penusah angus nyadi ba lapan ari 14 kes (dalam taun 2019), ketegal nyumai lalu dua kes ketegal sot karan. Dua kes mengkang dipansik.
Taun siti nyin tadi (2018) Bomba Nengeri ngerikod 24 iti kes buah rumah panjai angus, ba taun 2017 (26) lalu ba taun 2016 (20).