Anda di sini

Sarawak Regatta 2019 diatur kena 25 Oktober-3 November

Advertisement
 Abdul Karim (lima kanan) ngarika pengatur Sarawak Regatta nerima replika chek ari gerempung ke ukai dikuasa perintah (NGO) ti nyukung ari sukut belanja dikena ngerichah sereta ngemujurka pengerami nya. Sama bisi datai kemari  Snowdan (tiga ari kanan) enggau Sebastian (empat kiba). — Gambar Muhd Rais Sanusi
TERIMA KASIH: Abdul Karim (lima kanan) ngarika pengatur Sarawak Regatta nerima replika chek ari gerempung ke ukai dikuasa perintah (NGO) ti nyukung ari sukut belanja dikena ngerichah sereta ngemujurka pengerami nya. Sama bisi datai kemari Snowdan (tiga ari kanan) enggau Sebastian (empat kiba). — Gambar Muhd Rais Sanusi

KUCHING: Sarawak Regatta - Kuching Waterfront Festival 2019 ti diatur 25 Oktober nyentuk 3 November siti ari pengerami ke dikearap ulih mantu nyapai juluk 5 juta iku temuai datai ke Sarawak taun tu.

Menteri Nembiak Lumba enggau Main Datuk Abdul Karim Rahman Hamzah, madahka Sarawak Regatta endang siti ari pengerami ke dianti kelebih agi deka mai pemanah ngagai industri dagang temuai nengeri tu.

“Tu siti pengerami ti endang dianti, laban enti kitai meda pemayuh penyereta ari luar menua tu bisi beribu iku, tu chukup manah (ngagai industri dagang temuai).

“Kelebih agi ba bulan November enggau ujung bulan Oktober, kitai deka meda penambah ti chukup mayuh ba penyampau temuai datai ke Sarawak. Ngarapka kitai ulih nyapai juluk lima juta temuai datai kitu lebuh manggai ujung taun tu,” ku iya dalam aum pemberita Sarawak Regatta ti diatur ba Bilik Aum Ringkat 2 Begunan Baitulmakmur ditu, kemari.

Abdul Karim ti mega nyadi Menteri Dagang Temuai, Seni enggau Main Asal ngadang enda kurang ari 50,000 iku orang datai ngagai  Sarawak Regatta - Kuching Waterfront Festival 2019 (25 Oktober ngagai 3 November 2019) ti diatur ba Tebing Sungai Sarawak ditu.

Nya berindik ari mayuh acara diatur nyerumba Sarawak Regatta ke diatur dua minggu nyengkaum Sarawak International Dragon Boat Race ke-7 (26-27 Oktober 2019); Lumba Perau Sarawak Regatta (1-3 November 2019) kelimpah ari festival nyual pemakai (Sarawak Kitchen) enggau Orang dagang, pengawa bejual Kraf Malaysia, pemerindang main asal, karaoke, pekit gendang Melayu Sarawak, buskers enggau belagu ti diatur sepemanjai timpuh nya.

“Kitai ngarapka deka meda enda kurang ari 50,000 iku orang datai tang aku pechaya deka lebih ari nya laban tu nyengkaum orang ke datai ngagai palan pemandang enggau bejual kraf enggau festival nyual pemakai, laban enti semina orang ke meda lumba perau aja lebih ari 10,000 iku.

“Nambahka nya bepelasarka peneleba kitai ngatur Sarawak Regatta sebedau tu, asil ari pengawa bejualka barang kraf aja bisi taun iya asil jual lebih RM1 juta, bisi taun teulihka RM800 ribu lalu taun tu kitai nagit RM900 ribu tang kitai pechaya deka lebih ari nya laban Regatta diatur ujung bulan,” ku iya.

Dulu ari nya lebuh ke ngenang pasal pemayuh penyereta Sarawak Regatta, iya madahka bisi 13 menua luar masuk pekit Sarawak International Dragon Boat Race ti berebutka lima kategori iya nya International Premier Open’s 20 crews, International Premier Open’s 12 Crew, International Premier Women 12 crew, International Premier 12 mix enggau International Master 12 crew (beumur 40 taun ke atas).

“Pesereta Sarawak International Dragon Boat Race ke sekali tu bisi nambah ari taun ke udah, taun 2018 bisi lapan buah menua ngambi bagi dibandingka enggau taun tu bisi 13 buah menua, nambah lima buah menua.

“Entara 13 buah menua masuk pekit Sarawak International Dragon Boat Race ke-7 iya nya nyengkaum Brunei (10 tim), Amerika Syarikat keterubah iya nganjung tim iya nya bisi  65 pengayuh (40 iku indu enggau 25 iku lelaki), China, Thailand, United Arab Emirates, Chinese Taipei (Taiwan), Filipina, Hong Kong, Singpura, Indonesia, Mynmar, sereta Malaysia (Sabah, Sarawak, Penang enggau Kuala Lumpur).

“Legit pengawa Sarawak Regatta ti berebutka Tropi Raja Sungai ditimpuhka kena 3 November 2019 (Hari Minggu),” ku iya.

Nitih ku iya, Sarawak Regatta enggau ‘Eye-Dotting’  deka dipenyadi Kepala Menteri Datuk Patinggi Abang Johari Tun Openg kena 26 Oktober 2019  .

“Penutup Sarawak Regatta deka penyadika Tuai Megai Menua nyerumba legit pengawa iya nya kena 3 November,” ku iya.

Ungkup Sarawak Regatta aja bisi disediaka perais mata duit sepenyampau RM240,000 lalu pemenang Raja Sungai deka mai pulai tropi enggau mata duit sepenyampau RM10,000, kelimpah ari nya tanda kelai sepenyampau RM39,000 disediaka ungkup pekit  Sarawak International Dragon Boat Race, ku iya.

Kemari, Abdul Karim bisi nerima sukung belanja ari Petronas (Pemelanja Besai) sepenyampau RM500,000; Petra Energy Berhad (Gold) (RM100,000); JX Nippon Oil & Gas Exploration (Malaysia) Limited (Bronze) (RM30,000) enggau ari Ta Ann Holdings Berhad (Bronze) RM30,000.

Pengawa nyual pom penyereta berengkah dibuka kena 18 September 2019 ba Opis Kaunsil Sungai-Sungai Sarawak, Ringkat 2 Begunan Electra House. Hari kepenudi pom penyereta diterima iya nya ke 10 Oktober 2019 pukul 12 tengah hari.

Bisi ba aum pengarang berita nya, Menteri Muda Nembiak Lumba enggau Main Datuk Snowdan Lawan sereta Menteri Muda Dagang temuai, Seni enggau Main Asal Dato Sebastian Ting enggau ke bukai.

  • oleh
  • Advertisement