Anda di sini

Perambu nginsur umur pekereja pinchin enda patut dipejalaika

Advertisement
ABDUL RAHMAN
ABDUL RAHMAN

KUCHING: Perambu perintah sebedau tu ti deka nyerenih baru umur pekereja pinchin ari 60 ngagai 65 taun dipeda enda patut dipejalaika. Ungkup serakup nembiak di Sarawak, perambu nya dipeda deka nyadi penanggul lalu nagang peluang kereja ngagai rebak biak.

Pertubuhan Kebangsaan Belia Bersatu Sarawak (Saberkas)  madah, manah agi perintah ngenanka ‘status quo’ ke diatu, iya pinchin ba umur 60 taun.

Mandal Presiden Saberkas Sarawak, Datuk Dr Abdul Rahman Junaidi madah, nengah pengawa ngetan pinchin ba umur 60 taun, nya meri awak ngagai pengereja pengawa  perintah ke beumur 60 taun pinchin sereta ngenatka diri.  

“Manah agi tanka status quo ( pinchin ba umur 60 taun).

“Kitai patut meri peluang ngagai bala pemesai biak niki pangkat ngambika sida ulih gawa ke mensia mayuh enggau menua,” ku iya madah ngagai Utusan Borneo ditu,kemari.

Taja pia, kemari BERNAMA bisi diripotkam madah, Menteri Besai, Tun Dr. Mahathir Mohamad madahka nadai kebuah ngelanjar umur pinchin mandatori ari 60 ngagai 65 taun.

Iya stuju enggau penemu Menteri Nembiak Lumba enggau Main, Syed Saddiq Syed Abdul Rahman ngambi ngetanka pinchin ba umur 60 taun ngambika enda nekul peluang kerejaan rebak biak.

“Anang madahka Menteri Besau udah beumur 94 taun tang enda pinchin. Aku ukai enda pinchin, tang dikangauka gawa baru.

“Enti kitai netapka pemesai pinchin ba umur 65 taun, ‘deadwood’ ila pan duduk ba atas kerusi nya lalu orang bukai enda  ulih duduk dia (niki pangkat).

“Bag aku, manah enti pinchin ba umur 60 taun,” ku iya ba sebengkah aum media begulai enggau media Malaysia beserimbai enggau penemuai iya pengelama tiga hari ke Kemboja.

Isu pinchin nya keterubah endar duiperambu Kongres Kesatuan Sekerja Malaysia (MTUC) ngambika umur pinchin dilanjar ngagai 65 taun baka ba sekeda menua maju, nyengkaum Singapura.

Taja pia Menteri Nembiak Lumba enggau Main, Syed Saddiq Syed Abdul mantah perambu nya sereta m a dahka perintah patut fokus nyendiaka peluang kereja ke bekualiti ngagai rebak biak sereta ukai nyekat potensial sida.

Advertisement