Dikarang Rengenyan Labang
KUCHING: Perintah nengeri deka mansik tauka meresa Ordinan Lembaga-Lembaga Pelabuhan 1961 (Sarawak) dikena nentuka fasiliti palan penyangkai kapal Sarawak dikemanahka agi sereta diatur ngena chara moden.
Kepala Menteri, Datuk Patinggi Abang Johari Tun Openg madah sekeda fasiliti tauka kereban ba palan penyangkai kapal patut diangkatka agi pemanah awakka ulih setipak enggau peminta palan penyangkai kapal moden.
Iya madahka perintah nengeri ukai ngelanggur tauka mantaika runding deka ngubah tang deka mansik tauka meresa Ordinan Lembaga-Lembaga Pelabuhan 1961 (Sarawak).
"Nama utai ke disebut aku iya nya kami deka ngenegapka agi palan penyangkai kapal Sarawak.
"Reti iya kitai deka mansik tauka meresa ordinan kitai dikena napi peminta fasiliti palan penyangkai kapal moden.
"Laban diatu orang (eksport enggau import) nuju ngagai pengawa sistem pengangkut entara mod ti ngena kontena sereta ngatur palan penyangkai kapal ngena chara moden. Nya kebuah kitai patut mansik tauka meresa ordinan kitai," ku iya lebuh dikerandau raban pemberita pengudah bejadika Hari Eksport Sarawak 2019 ba sebuah hotel ditu, sehari tu.
Lebuh dipinta ngenang pasal belanja ke dikena perintah ngangkatka agi pemanah fasiliti palan penyangkai kapal menua tu, Abang Johari madahka pekara nya deka dipansik dulu.
"Pekara nya (anggar belanja) bepanggai nya kebuah kitai patut mansik dulu ordinan kitai. Kitai meda operasyen palan penyangkai kapal, engka kitai patut ngangkatka pemanah sekeda fasiliti.
"Ambika chunto, ngatur palan penyangkai kapal baka ngemansang sereta ngena teknologi komputer tauka ngena teknologi komputer ngatur palan penyangkai kapal," ku iya.
Sarawak bisi empat palan penyangkai kapal iya nya Palan Penyangkai Kapal Kuching, Rajang, Bintulu enggau Palan Penyangkai Kapal Miri.
Bisi datai ba pengerami nya, Sapit Kepala Menteri ti mega Menteri Pemansang Mengeri enggau Pengeraja Asal II Datuk Amar Awang Tengah Ali Hasan; Speaker Kunsil Nengeri Datuk Amar Mohamad Asfia Awang Nasar; Menteri Perengka Pengangkut Datuk Lee Kim Shin; Menteri Muda Pemansang Dagang Antarabansa enggau Industri, Terminal Industri enggau Pemansang Orang Dagang Datuk Mohd Naroden Majais sereta ke bukai.